هرات ولایتینینگ اوقیتووچیلری و اوقووچیلریدن بیرقطاری درسی کتاب آزلیگیدن شکایت قیلهدی، بیراق بیرینچی صنفدن اون ایکینچی صنف درسی کتابلری، مذکور ولایت قاره بازاریده ساتیلهدی.
انچه ییللردن بویان مکتب درسی کتابلری چاپ ایتیلیشی و ترقهتیلیشی ناقانونی دییلگن، بیراق حاضرگچه اوشبو درسی کتابلر سودا و ساتیغی قیزیق بولیب و بوتوغریده هیچ بیر توسیق یوق دیر.
قیز مکتبلریدن بیرینینگ اوقیتووچیسی نسیمهگه کوره، برچه درسی صنفلر کتاب آزلیگیگه روپهره بولیب تورگن؛ بیراق یوقاری صنفلرنینگ هیچ قندهی درسی کتابی یوق دیر و اوقیتووچیلرنینگ بیاناتیدن رویخط آلهدیلر. امیرعلی شیرنوایی مکتبینینگ اوقووچیلریدن بیری محمد حنیفنینگ ایتیشیچه، مکتب مدیریتی او و باشقه صنفداشلریگه بیولوژی، جیولوژی، ریاضی، فارسی، کیمیا و فزیک کتابلرینی بیرمهگن. دیمک بو کتابلر بازارده تاپیلهدی، بیراق ساتیب آلیشگه کوچی ییتمهیدی.
حاضرگی کونلرده آقو قاره باستیریلیب چیقریلگن درسی کتاب 40 افغانی و رنگه باستیریلیب چیقریلگن کتاب 100 افغانی قاره بازارده ساتیلهدی. اوشبو کتابلردن کوپینچهسی جوده قویی کیفیتده پاکستان نینگ لاهور و پیشاور باسمهخانهلریده باستیریلیب چیقهدی.
.jpg)
هرات شهریدهگی مکتبلردن بیرینینگ اجراییه مدیری عبدالرؤوف امینینینگ سلاموطندارگه ایتیشیچه، حکومت میلیونلرچه دالرنی درسی کتابلر چاپ ایتیشگه خرچ قیلگن، بیراق اوشبو ولایتنینگ کوپینچه مکتبلری، حاضرگهقدر درسی کتاب آزلیگیگه روپهره بولیب تورگن.
بیراق، درسی کتاب ساتووچیلرینینگ ایتیشیچه، اولر دولتی مکتبلرده فایدلنهدیگن اصلی کتابلرنی ساتهدی و اولرنینگ بو ایشی معارف وزیرلیگی قانونیگه قرشی ایمس دیر. کتاب ساتووچیلردن بیری غلام سرورنینگ ایتیشیچه، شونینگدیک معارف ریاستی، دستلبکی صنفلر اوچون بولگن درسی کتابلرنی اوقووچیلرگه وقتینچهلیک ساتهدی و تعلیمی ییل یکونلنگنیدن کیین، قیتهدن اوقووچیلرنینگ قولیدن آلهدی.
هرات ولایتینینگ معارف ریاستی باشلیغی عبدالرزاق احمدی، معارف ریاستینینگ ایشچیلری و اوقیتووچیلر تامانیدن درسی کتابلر ساتیلیشینی رد قیلهدی؛ بیراق قاره بازارده درسی کتابلر ساتیلیشینی تَن آلهدی.
جناب احمدی، اوشبو ساتیب آلیشلر دلیلینی معارف وزیرلیگی تامانیدن ترقهتیلهدیگن کتابلر آزلیگی دیب بیلهدی.
