بوندن اوچ کون آلدین زابل ولایتی نینگ شاه جوی ولسوالیگیده اوغیرلنگن 30 یولاووچی حقیده گی سونگی خبرلرگه قره گنده، اوغیرلنگن یولاووچیلر بو ولایت نینگ ناوه و خاک افغان ولسوالیک لریگه آلیب باریگنلر.
ایچکی ایش لر وزیرلیگی نینگ بلند مرتبه لی رسمیلری، افغان ملی کوچلری اوغیرلنگن شخص لر سقلنه دیگن منطقه نی قاپله گن لیک لرینی ایتگن.
اما، هنوز گچه هم اوشبو معلومات سیر سقلنه دی. وزیرلیک اوغیرلنگن شخص لر قه ییرده سقله نیشی باره سیده هیچ نرسه ایته آلمس لیک لرینی بیلدیرگن.
زابل ولایتی کینگش بیر اعضاسی نینگ سلام وطندارگه ایتیشیچه، اوغریلر، اوغیرلنگن لرنی سقلش اوچون مخصوص و مناسب ییرگه ایگه ایمسلر. اوغیرلنگنلر بیر ییرده ممکن باشقه بیر جایگه آلیب باریلسه، یا – ده یاشیرون شکلده مسجد لرده سقله نیش لری ممکن لیگی نی ایتگن.
حوت آیی نینگ 4- سی دوشنبه کنی ایرتلب نا معلوم قوراللی شخص لر کابل – زابل عمومی ترانسپورت یولیده 303 تیپلی موترنی توخته تیب یولاووچی لردن 30 کیشی نی اوز لری بیلن نا معلوم ییرگه آلیب کیتیشگن ایدی.
عینی گواه لر و ولایت محلی مسووللری، اوغریلر قاره کییم ده بولیب چیت ایل (خارجی) تیلده سوزله شووچلر بولگن لیگی نی ایتگن ایدیلر.
زابل ولایت شاه جوی تومنی نینگ ولسوالی عبدالخالق ایوبی، حوت آیی نینگ 5-سی سه شنبه کونی سلام وطندارگه، وایش قوراللی طالب لرنی حرکت ایمس « داعش گروهی» اعضالر ایشی بولیشی گمان سیره لگن لیگی نی بیلدیرگن ایدی.
بیرا، اوز نامی فاش ایتیلیشی نی ایستمه گن نماینده لر مجلسی نینگ بیر عضوی سلام وطندارگه، اوشبو یولاووچی لر طالبان حرکتی نینگ قوماندانلریدن ملا عبدالله کاکر طرفیدن اوغیرلنگن لیک لرینی ایتگن ایدی.
زابل ولایتی کینگش اعضاسی اسد کاکر، اوشبو ایش طالب یا – ده داعش آرقه لی عملگه آشیریلگن لیگی توغریسیده شبهه بیلدیریشگن. اما، عینی گواه لر مسافرلر قاره کییم ده بولگن نا معلوم شخص لر تامانیدن اوغیرلنگن لیگی نی ایتگن لر.
افغانستان ایچکی ایش لر وزیرلیگی سوزلاوچی سی نینگ اورین باسری نجیب دانش نینگ سلام وطندارگه معلوم قیلیشیچه، آدم اوغیرلاووچی لرنینگ کیم لیگی هنوزگچه هم انیق لنمه گن. اونگه کوره، بو گروه کیم لیگی باره سیده قضاوت قیلیش هلی ایرته لیگی نی تیلگه آلگن.
شونینگ دیک دانش گه کوره، ایچکی ایشلر وزیرلیگی اوغیرلنگن لر قوییب یوباریلیشی اوچون جدی سعی و حرکت ده دیر.
عین حالده، اسد کاکر، برچه اوغیرلنگن یولاووچی لرگه جانی تلفات ییتکزیلمه گن لیگی نی ایتیب، بولر قوییب یوباریلیشی اوچون منطقه قوم یاش اولوغ لری نینگ سعی وحرکت لر بارلیگی معلوم قیلدی.
ایچکی ایشلر وزیرلیگی، اوغیرلنگن لر آزاد ایتیلیشلری اوچون قوم یاش اولوغ لری واسطه چیلیککه باشله گن لیک لرینی تصدیق له گن.
قندهار – کابل عمومی ترانسپورت یولی نابرقرار یوللردن سنه له دی. طالب لر قوشیمچه ایریم قوراللی گروه لر انده – سنده مذکور یولده آدم لرنی موتر دن توشیریب نا معلوم ییرگه آلیب کیته دیلر.
سونگی کونلرده افغانستان نینگ بعضی بیر ولایت لریده اسلامی دولت جنگری لری (داعش) گروهی کوزه تیلگن لیگی ایتیله دی. اما، هنوز گچه هم اوشبو حادثه مسوولیتینی هنوز گچه هم هیچ بیر گروه یا شخص اوز بوینیگه آلیشمه گن.
