افغانستان؛ جاری قویاش ییل نینگ 8 آیی‌ده مملکت نینگ 9 ولایتیده عیاللرگه قرشی 2 مینگ‌دن آرتیق زوروانلیک قضیه رویخط‌گه آلینگن.
جوزجان، سرپل، بغلان، سمنگان، هلمند، بلخ، بامیان، پروان و هرات ولایت‌لریده عیاللر ایشلری بوییچه ریاست مسؤوللری نینگ ایتیش‌لریچه، مذکور ولایت‌لرده اوتگن 8 آیده عیاللرگه قرشی 2004 زوروانلیک واقعه یوز بیرگن.
اوشبو مسؤوللرگه کوره، بو ریاست‌لرده رویخط‌گه آلینگن قضیه‌لرگه کلتک‌لش، جنسی زوروانلیک، اویدن چیقاریش، قیناققه سالیش، زورلب تورموش گه چیقاریش، کم‌سیتیش، سوکیش و منزل‌دن قاچیش شامل بولگن.
بغلان ولایتی بوییچه عیاللر ریاستی مسؤوللری نینگ ایتیش‌لریچه، جاری قویاش ییل باشلنگنیدن بویان اوشبو ریاست‌ده عیاللرگه قرشی 150 زوروانلیک قضیه رویخط‌گه آلینگن.
بغلان ولایتی بوییچه عیاللر ریاستی نینگ حقوق مدیری اورانوس عاطفی نینگ ایتیشیچه، بو واقعه‌لرگه کلتک‌لش، اویدن قاچیش، ایریلیش، نفقه توللنمه‌گنی، قتل، زورلب تورموش گه چیقاریش و خلوگه بیریش شامل بولگن.
سمنگان ولایتی بوییچه عیاللر ریاستی مسؤوللری نینگ ایتیشیچه، جاری قویاش ییل باشلنگنیدن بویان اوشبو ریاست‌ده عیاللرگه قرشی 250 دن آرتیق زوروانلیک واقعه رویخط‌گه آلینگن.
سمنگان ولایتی بوییچه عیاللر ریاستی نینگ حقوق مدیری بانو شیرزادنینگ ایتیشیچه، اولر کمیده 100 کیچیک قضیه‌نی محل بویوک‌لری نینگ واسطه‌چیلیگی بیلن حل قیلگن.
هرات ولایتیده عیاللر ریاستی مسؤوللری نینگ ایتیشیچه، جاری میلادی ییلده اوشبو ولایتده عیاللرگه قرشی 801 زوروانلیک قضیه رویخط‌گه آلینگن.
هرات ولایتی بوییچه عیاللر ریاستی باشلیغی انیسه سروری، بو ولایتده عیاللرگه قرشی زوروانلیکلر 21% کوپه‌یگنیدن خبر بیرگن.
خانم سروری گه کوره، رویخط‌گه آلینگن قضیه‌لردن 370 دن آرتیغی کلتک‌لش، 114 قضیه سوکیش و کم‌سیتیش، 60 دن آرتیق قضیه عایله تامانیدن قیناققه سالیش، 52 قضیه جنسی زوروانلیک و قالگنی ایسه اویدن قاچیش، زورلب و قانونی یاشدن قویی‌لرنی تورموش گه چیقاریش بولگن.
جوزجان ولایتی بوییچه عیاللر ریاستی مسؤوللری، بو ولایتده عیاللرگه قرشی زوروانلیکلر کمه‌یگنیدن خبر بیره‌دی.
جوزجان ولایتیده عیاللر ریاستی باشلیغی مسلمه غنی‌زاده نینگ ایتیشیچه، اوشبو ولایت نینگ مرکزی و تومن‌لریده تعلیمی برنامه‌لر، مسجدلر و منبرلر آرقه‌لی آگاه‌لنتیریش برنامه‌لر یولگه قوییلگنی باعث، عیاللرگه قرشی زوروانلیکلر کمه‌یگن.
جوزجان ولایتی بوییچه عیاللر ریاستی باشلیغی گه کوره، بو ولایتده عیاللرگه قرشی زوروانلیک واقعه‌لری 221 واقعه‌دن 143 واقعه گه کمه‌یگن و رویخط‌گه آلینگن قضیه‌لردن کوپینچه‌سی کلتک‌لش، قتل و خودکشلیک بولگن.
سرپل ولایتیده عیاللر ریاستی سرپرستی دل افروز قاضی‌زاده نینگ ایتیشیچه، سرپل‌ده اوتگن ییل‌گه نسبتن عیاللرگه قرشی زوروانلیک واقعه‌لری 10% آشگن.
اونگه کوره، بو ولایتده جاری قویاش ییلده قتل، خودکشلیک، زورلب تورموش گه چیقاریش و عیاللرنی کلتک‌لش رقمی یوقاری کیتگن.
هلمند ولایتیده عیاللر ریاستی باشلیغی وجیهه رسولی نینگ ایتیشیچه، اوتگن بیر ییل جریانیده بو ولایتده عیاللرگه قرشی 95 زوروانلیک قضیه رویخط‌گه آلینگن.
خانم وجیهه گه کوره، عیاللرگه قرشی زوروانلیک واقعه‌لریدن کوپینچه‌سی اوزاقده بولگن منطقه‌لرده یوز بیره‌دی و ناتینچلیک باعث، بو ریاست‌ده باشقه سبب‌لر رویخط‌گه آلینمه‌گن.
بامیان عیاللر ریاستی نینگ ایتیشیچه، بو ولایتده عیاللرگه قرشی زوروانلیک اوتگن ییل گه نسبتن کمیده 10 فایز کوپه‌یگن.
مذکور ریاست تامانیدن ترقه‌تیلگن رقم اساسیده، اوشبو ولایتده اوتگن بیر ییلده عیاللرگه قرشی 114 تورلی زوروانلیک قضیه‌سی قید ایتیلگن. عین حالده، جاری ییل نینگ بیرینچی 8 آیی‌ده بو رقم 86 قضیه گه یتیشگن.
بامیان عیاللر ریاستی باشلیغی ذکیه رضایی نینگ ایتیشیچه، جاری ییلده 7 جنسی زوروانلیک، 4 خودکشلیک که اقدام و 2 عیال قتل ایتیش قضیه‌سی قید ایتیلگن.
بلخ ولایتی عیاللر ریاستی قضیه‌لرینی تیکشیره‌دیگن و اجرایی مدیری حیلمه سروری نینگ ایتیشیچه، جاری ییل نینگ 8 آیی‌ده عیاللرگه قرشی کمیده 357 زوروانلیک قضیه قید ایتیلگن و بو رقم اوتگن ییلده 340 قضیه گه یتیشه‌دی ایکن.
پروان عیاللر ریاستی باشلیغی شاجان یزدان‌پرست نینگ ایتیشیچه، بو ولایتده عیاللرگه قرشی زوروانلیک قضیه‌سی اوتگن ییل گه قره‌گنده کوپه‌یگن.
خانم یزدان پرست گه کوره، اوتگن ییل بو ولایتده عیاللرگه قرشی 160 زوروانلیک قضیه‌سی قید ایتیلگن ایدی، بیراق جاری ییل نینگ بیرینیچی 8 آیی‌ده مذکور رقم 122 قضیه گه یتیشگن.
شونینگدیک انسانی حقلر کمیسیونی عیاللرگه قرشی زوروانلیک 8 فایز یوقاری کیتگنیدن خبر بیره‌دی. مذکور کمیسیون نینگ رقمی اساسیده، جاری قویاش ییلده عیاللرگه قرشی افغانستان بویلب 2 مینگ و و762 قضیه قید ایتیلگن.
افغانستان بوییچه بیرلشگن ملتلر تشکیلاتی نینگ اورین باسرلیک هیأتی (یوناما) بیر خبرنامه ترقه‌تیب، افغانستان حکومتی و اهالیسی‌دن جنسی زوروانلیکلر یکونلنیشی توغریسیده سعی و حرکت قیلیش‌لرینی سوره‌گن.
مذکور خبرنامه‌ده افغانستان بوییچه بیرلشگن ملتلر تشکیلاتی نینگ خاص نماینده‌سی تدامیچی یاماموتو نینگ ایتیشیچه، عیاللرنینگ خوفسیزلیگی سقله‌نیشی توغریسیده قیینچلیکلر بار، بیراق اولر عیاللرگه قرشی جنسی زوروانلیکلر یکونلنیشی اوچون دادخواهلیک قیله‌دیلر.
شونینگدیک نماینده‌لر کینگشی بیر قطعنامه صادر قیلیب عیاللرگه قرشی هر قنده‌ی تبعیض نی قاره‌لگن. مذکور قطعنامه‌ده، نماینده‌لر کینگشی حکومتدن ملی بودجه گه جنسی برابرلیک و عیاللرگه قرشی زوروانلیک کمه‌یشی اوچون جدی اقدام قیلیشی نی سوره‌گن.
نماینده‌لر کینگشی حکومتدن عیاللرگه تینچلیک پروسه‌سیگه اوخشش کتته اجتماعی و سیاسی پروسه‌لرگه اساسی نقش اوینه‌شلری اوچون فرصت بیریشی نی سوره‌گن.
شو توغریده…
باش‌قاره‌لاوچیلیک: 1 ییلده عیاللرگه قرشی 2527 قضیه تیکشیریلگن
