.jpg)
د افغانستان فوټبال ملي لوبډلې پخواني لوبغاړي او د اوسنۍ ملي لوبډلې مرستیالروزونکي انوش دستګیر سلام وطندار سره په ځانګړې مرکې کې ویلي، اوسمهال د فوټبال لوبې د روزنې په برخه کې د اروپا تر ټولو معتبر سند په لاس کې لري او په نړۍواله کچه د هرې ملي لوبډلې او کلپ روزنه ترسره کولی شي.
د ښاغلي دستګیر په وینا، که افغان فوټبال فدراسیون ده ته د افغانستان فوټبال ملي لوبډلې د مشر روزونکي دندې اخیستو وړاندیز وکړي دی یې د اوس لهپاره اراده نه لري.
نوموړي زیاته کړه، د فوټبال ملي لوبډلې په روزنې کې روزونکي یوازې له ۵۰ تر ۶۰ ورځو په روزنه بوخت وي؛ خو دا چې ده د (الف) درجې روزنې سند ترلاسه کړی؛ هڅه کوي چې هره ورځ د فوټبال لوبغاړیو سره په میدان کې تېره کړي چې د ملي لوبډلې سره بیا دا کار ناشونې دی.
د ښاغلي دستګیر په خبره، که افغان فوټبال فدراسیون لهده د مشر روزونکي غوښتنه وکړي؛ ښایي تر راتلونکیو ۵ تر ۱۰ کلونو وروسته دې دندې اخېستلو ته زړه ښه کړي.
مرستیال روزونکي انوش دستګیر وویل چې اوسمهال د افغانستان فوټبال فدراسیون د نوي روزونکي پر ګومارلو کار کوي او ښایي تر راتلونکې یوې میاشتې د ده او د اوسني مشر روزونکي اوتوفیستر د ځایناستي په اړه پرېکړه وشي.
.jpg)
انوش دستګیر څو ورځې مخکې د اروپا فوټبال په تاریخ کې د تر ټولو ځوان روزونکي په توګه د لومړۍ (A) درجې فوټبال روزنې سند ترلاسه کړ.
دغه روزونکي پهخپلې مرکې کې وویل، له ټولو پړاونو او زدهکړو وروسته یې د دې روزنې سند ترلاسه کولو لهپاره تر ټولو زیاتې له ۱۰ نه ۹ اعشاریه ۳ نومرې ترلاسه کړېدي.
انوش دستګیر ۲۸ کاله عمر لري چې دمګړۍ په هالینډ کې ژوند کوي او د ۲ کالونو لهپاره یې له ۲۰۱۵ نه تر ۲۰۱۷ کال پورې د افغانستان فوټبال ملي لوبډلې په ګټه په ۴ نړۍوالو سیالیو کې لوبې هم کړېدي.
د فوټبال ملي لوبډلې مرستیال روزونکي انوش دستګیر چې په ۲۰۱۶ کال کې د لنډې مودې لهپاره د افغانستان فوټبال ملي لوبډلې روزونکی هم و؛ له اروپا څخه د ستر (A) درجې د سند په لاستهراوړلو خوښي ښودلې ده.
دستګیر په ۲۰۱۵ کال کې له افغان فوټبال ملي لوبډلې سره یوځای شو چې په دفاع او منځلیکې کې یې لوبې کولې او د ۴ نړۍوالو سیالیو لوبو وروسته یې تېرکال له نړۍوال فوټبال سره مخه ښه وکړه او روزنې ته یې مخه کړه.
