انسان حقوقی ایرکین کمیسیونی نینگ ایتیشیچه، اوشبو نهاد نینگ تیکشیرووی گه کوره هلمند نینگ سنگین تومنیده طالبان هجومی گه عکس‌العمل امنیتی کوچلر تامانیدن آتیلگن راکت‌لر تینچ‌اهالی نینگ تلفاتی گه سبب بولگن.
اوتگن کون (چهارشنبه 14- سرطان) شام چاغی مذکور نهاد تامانیدن ترقه‌تیلگن اعلامیه گه قربانیلر، حادثه شاهدلری، قوم بویوک‌لری و هلمند ساغلیک نهادلری، مدنی جماعه‌چیلیک و ولایتی کینگش اعضالری‌دن نقل قیلینیب کیلیشیچه، قویاش جاری ییل 9- سرطان ده سنگین تومنیده‌گی بیر بازار ده اوچ آغیر قورال اوقی اصابت قیلگن کیم نتیجه‌ده، 27 تینچ‌اهالی هلاک و باشقه 35 کیشی یره‌لنگن.
مذکور کمیسیون گه کوره، امنیتی کوچلر طالبان بیلن آتیشه‌دیگن بیرچاغده بو راکت‌لرنی آتگن.
انسان حقوقی ایرکین کمیسیونی اوشبو هجوم نی خلق‌ارا انسان دوست‌لیک قانون‌لریگه قرشی دیب و اوروش تامان‌لریدن خلق‌ارا انسان دوست‌لیک قانون‌لرینی مراعات قیلیش‌لرینی سوره‌گن.
شونینگدیک مذکور کمیسیون بو حادثه جدی و هر تامانلمه تیکشیریلیشی خصوصیده حکومت‌دن طرف‌سیز بیر هیأت تعیین قیلیشی نی سوره‌گن.
اوتگن دوشنبه کونی 9- سرطان هلمند ولایتی سنگین تومنی نینگ کهنه بازاریده بمب جایلشتیریلگن بیر موتر پارتلشی و راکتی هجوم تینچ اهالیدن قربانی آلدی.
مذکور حادثه‌دن کیین هلمند حاکمی نینگ دفتری بیر خبرنامه ترقه‌تیب، طالبان تامانیدن 4 موشک آتیلیشی و بمب جایلشتریلگن بیر موتر پارتله‌شی عاقبتی‌ده 23 تینچ‌اهالی هلاک و باشقه 15 تینچ اهالی ایسه یره‌لنگنیدن خبر بیردی.
طالبان گروهی بو راکتی هجوم نی امنیتی کوچلرگه نسبت بیردی، بیراق هلمند حاکمی نینگ دفتری امنیتی کوچلر تامانیدن راکت آتیلگنی نی رد قیلدی.
مذکور حادثه‌دن بیر کون اوتگنیدن کیین، افغانستان بوییچه بیرلشگن ملتلر تشکیلاتی نینگ اورین‌باسرلیک هیأتی دفتری اعلام قیلیشیچه، بو نهاد نینگ بیرینچی و طرف‌سیز معلومات‌لریگه کوره، هلمند ولایتی نینگ سنگین تومنی بازاریده طالبان هجومی گه عکس‌العمل اردو کوچلری آرقه‌لی آتیلگن راکت تینچ اهالی نینگ تلفاتی گه سبب بولگن.
یوناما بیر توییت یازیب ایتیشیچه، نیچه ایشانچلی منبع اردو کوچلری نینگ راکت آتیشی باعث تینچ‌اهالی تلفات کورگنی توغریسیده معلومات بیرگن.
