امیریکه قوشمه ایالتلری کینگیتیریش ادارهسی (USAID) افغانستان نفوسینی عمومی سنشگه 15 میلیون دالر یاردم بیرهدی. اوشبو ادارهنینگ سنبهشنبه کون بیر خبری ییغینده ایتیشیچه، بو سنش افغانستان حکومتی و خلقارا یاردم بیروچی ادارهلر اختیاریده اقتصاد و دموگرافیک توغریسیده دقیق معلومات بیرهآلهدی.
امیریکهنینگ خلقارا کینگیتیریش ادارهسی باشلیغی ویلیم همینگنینگ ایتیشیچه، بو سَنش، سیلاو اوتکزیلیشی، واکسیناسیون کمپاینلری، اوی قوریش برنامهلری، انسان دوستلیک یاردملر ترقهتیلیشی، شاشیلینچ وضعیت برنامهلریگه تیارگرلیک آلیش و باشقه ملی برنامهلر توغریسیده اونملی و یخشی معلوماتلرنی دولت و دنیاجماعهچیلیگی اختیاریده قویهدی.
شونینگدیک، امیریکه خلقارا کینگیتیریش ادارهسی خبرنامهسیده کیلیشیچه، افغانستان مرکزی احصائیه ادارهسی اوشبو اقتصادی، اجتماعی و دموگرافیک سرشمارلیگینی، بیرلشگن ملتلر تشکیلاتی جمعیت صندوقی همکارلیگیده 74 میلیون دالر خرجت بیلن عملگه آشیریشی ممکن. جاپان، دانمارک مملکتلری و شونینگدیک، بریتانیانینگ خلقارا کینگیتیریش تشکیلاتی بو توغریده یاردم بیرهدی.
اوشبو عمومی سنشده، افغانستان جمعیتی دقیق رقمی شهر و اطرافلردن توپلهنیب محاسبه بولیشی ممکن. دیمک بوندن آلدین، بامیان، غور، دایکندی، پروان، کاپیسا، کابل و سمنگان ولایتلریده، ولایتی نفوس سَنش عملگه آشیریلگن. امیریکه خلقارا کینگیتیریش ادارهسینینگ ایتیشیچه، باشقه بیرقطار ولایتلرنینگ نفوسینی سنش، میلادی 2018- ییل اداغیگچه یکونلنیشی ممکن.
افغانستان نفوسینی سونگی سَنلیشی میلادی 1979- ییلده عملگه آشیریلگن، بیراق مملکت نفوسی بوتونلهی سلنمهگن. افغانستان دولتینینگ تخمینلشیچه، مملکت جمعیتی 30 میلیون کیشیگه یقین بولگن.
