قندوز ولایتی کینگش اورین باسری صفیالله امیرینینگ سلاموطندارگه ایتیشیچه، اوتگن کیچه قندوز ولایتیده ملی اردو و محلی پولیس پوستهلری اوستیگه طالبان جنگریلری هجوم قیلگن.
اونینگ کوپهیتیریشیچه، بو هجوم نتیجهسیده، ملی اردو عسکرلریدن 26 تهسی و محلی پولیس کوچلریدن 3 تهسی هلاک ایتیلگن و شونینگدیک، ملی اردو حربیلریدن 15 تهسی و محلی پولیس کوچلریدن 5 تهسی یرهلنگن.
قندوز ولایتی کینگش اورین باسرینینگ ایتیشیچه، اوشبو هجوم اوتگن کیچه ساعت 12 ده قندوز شهرینینگ تلوکه و خواجهپاک منطقهسیده صورت تاپگن.
عینحالده، قندوز پولیس قومندانلیگینینگ سوزلاوچیسی انعامالدین رحمانی بو خبرنی تصدیقلگن؛ بیراق تلفات توغریسیده معلومات بیرمهگن.
شونینگدیک، 20- پامیر فرقهسینی سوزلاوچیسینینگ اورین باسری عبدالرحمان نیازینینگ ایتیشیچه، بو واقعهده امنیتی کوچلردن 4 تهسی هلاک ایتیلیب و باشقه 5 تهسی یرهلنگن.
اونینگ کوپهیتیریشیچه، آتیشمه نیتجهسیده طالبان جنگریلریدن 9 تهسی هلاک و باشقه 6 تهسی یرهلنگن.
عینحالده، بغلان ولایتیده امنیتی منبعلردن بیرینینگ کیملیگی سیر قالیشنی ایستهب سلاموطندارگه ایتیشیچه، بغلان مرکزی تومنیده طالبلرنینگ هجومی نتیجهسیده محلی پولیس کوچلریدن 11 تهسی هلاک و باشقه 3 تهسی یرهلنگن.
اوشبو منبع گه کوره، طالبلر مذکور پوسته حربی تجهیزاتلرینی اوزلری بیلن آلیب کیتگن.
منبعنینگ کوپهیتیریشیچه، بو واقعهده طالبان جنگریلریدن 3 تهسی هلاک و باشقه 4 تهسی یرهلنگن.
بغلان پولیس قومندانلیگینینگ سوزلاوچیسی احمد جاوید بشارت بو خبرنی تصدیقلیدی؛ بیراق تلفات توغریسیده صحبت قیلمهیدی.
طالبان گروهی بیر خبرنامه آرقهلی قندوز ولایتیده صورت تاپگن واقعه مسوولیتینی بوینیگه آلگن. خبرنامه گه کوره، مذکور هجومده امنیتی کوچلردن 30 تهسی هلاک ایتیلیب و 3 پوسته اوشبو گروه نظارتیگه اوتگن.
