اوتگن کون «سه‌شنبه» امریکا جمهور رییسی دونالد ترامپ، ینگی میلادی 2018- ییل‌نینگ بیرینچی کونیده اوز تویتر صحیفه‌سیده یازگن بیرینچی پیامی‌ده پاکستان‌نی یلغان‌چیلیک‌که عیب‌لب ایتیشیچه، بو مملکت امریکانینگ میلیاردلرچه دالر یاردمی بدلی‌ده الداوچیلیک و یلغان‌چیلیک‌دن باشقه هیچ نرسه قیلمه‌گن.
امریکا جمهور رییسی‌نینگ یازیشیچه، مملکتی حقیقت‌نی کورمس‌دن اوتگن 15 ییل‌ده پاکستان‌گه 33 میلیارد دالردن آرتیق پول یاردم بیرگن، بیراق بو مملکت امریکاگه الداوچیلیک و یلغان‌چیلیک‌دن باشقه هیچ نرسه بیرمه‌ی و امریکا رهبرلرینی اخماق قیلگن.
جناب ترامپ‌نینگ ایتیشیچه، افغانستانده امریکا تامانیدن نشانگه آلینه‌دیگن ترورچی‌لرگه پاکستان باش پناه بیرگن.
پاکستان برابریده امریکا جمهور رییسی دونالد ترامپ‌نینگ سونگی بیاناتی توغریسیده حربی ایش بیلرمانلردن بیرقطاری‌نینگ ایتیشیچه، منطقه مملکت‌لری بیلن پاکستان علاقه‌سی و موقعیتی سبب، امریکا بو مملکت‌نی اوستیگه اونچه‌لیک باسقین کیریتمه‌یدی.
ایش بیلرمانلرگه کوره، امریکا و پاکستان علاقه‌سینی کوپراق استخباراتی تشکیلات‌لر اداره قیله‌دی.
حربی ایش بیلرمان جاوید کوهستانی‌نینگ ایتیشیچه، امریکا و پاکستان استخبارات تشکیلات‌لری‌نینگ نظریدن، مذکور ایکی مملکت آره‌سیده هیچ قنده‌ی جنجل کورینمه‌یدی.
جناب کوهستانی‌نینگ کوپه‌یتیریشیچه، پاکستان و امریکا علاقه‌سیده پاکستان طرفدارلریدن بیری بریتانیا دیر و اسلام‌آباد بیلن واشینگتن علاقه‌سی یخشی سقله‌نیشی اوچون سعی و حرکت قیله‌دی.
جناب کوهستانی‌نینگ ایتیشیچه، ترامپ‌نینگ سونگی تویتی کوپراق فردی دیر و امریکا جمهور رییسی ایریم پیت‌لر اویله‌مس‌دن تویت و صحبت قیله‌دی.
بیراق، حربی ایش بیلرمانلردن باشقه بیری کابل‌خان تدبیرنینگ ایشانچی‌گه کوره، امریکا جمهور رییسی‌نینگ صحبت‌لری کیله‌جک‌ده عملی بولیشی ممکن.
جناب تدبیرگه کوره، پاکستان برابریده افغانستان‌نینگ موضوعی باعث، امریکا، مذکور مملکت‌نی باسقین آستیگه آله‌دی.
عین حالده، افغانستان جمهورلیک ریاستی مطبوعات دفتری سرپرستی شاه‌حسین مرتضوی، میدیالرگه یوبارگن بیر ویدیوده امریکا جمهور رییسی دونالد ترامپ‌نینگ سونگی بیانات‌لرینی افغانستان‌نینگ تشقی سیاستی فعال‌لیگی‌نی کورسته‌دی دیگن.
