د امریکا د متحده ایالاتو ولسمشر بارک اوباما د ۲۰۱۵ ز کال د بودجې طرحه د امریکا کانګریس ته وړاندې کړه. د دې طرحې له مخې په افغانستان کې د پاتې امریکایانو لپاره ۴۲ میلیارده ډالره نظامي بودجه ځانګړې شوې ده.
په دې توګه په افغانستان کې د هر امریکايي عسکر کلنی لګښت ۲،۱ میلیون ډالره کېږي چې په دوه کلونو کې تر څلور میلیونه ډالره هم ډېرېږي. دا په داسې حال کې دی چې اوس د افغان عسکرو د روزلو په موخه لس زره اته سوه امریکايي عسکر دېره دي. تر دې وړاندې هم د امریکا متحده ایالاتو په عراق او سوریه کې د داعش د مبارزې له پاره ۵،۳ میلیارده ډالره ځانګړي کړي و.
په ۲۰۱۴ میلادي کال کې د امریکايي عسکرو شمېر لږ شو او پوځي ماموریت په روزنیز او مشورتي ماموریت بدل شو، چې اوس افغان عسکرو ته روزنه او مشوره ورکوي. د ولسي جرګې د دفاعي کمیسیون غړی خالد پښتون وايي چې افغانستان د بهرنیانو په تېره د امریکا سختو مرستو ته اړ دی، پښتون له سلام وطندار سره په خبرو کې وویل چې که چېرته دغه مرستې د افغانستان د خلکو له لوري د افغان عسکرو لپاره ولګول شي، کوم درد به دوا نه کړي، نو ښه داده چې پخپله امرکیایان دغه پیسې مصرف کړي.
تر لسیزې ډېرې وخت کېږي چې امریکا د «تروریزم او القاعده سره جګړه» ترسرلیک لاندې په افغانستان کې په جګړه بوخته ده، چې د هاروارد پوهنتون د څېړنې له مخې دا د امریکا له پاره ډېر لګښت لرونکی جنګ دی.
