امریکا تشقی ایشلر وزیری جان کری پنج‌شنبه (30 ثور/19 می) ناتو باش قرار گاهی بروکسل‌ده قیلگن چیقیشی‌ده امریکا و اونینگ شریک‌لری‌نی نا معلوم مدتگه قدر اوز حربیلرینی افغانستانده سقلب قالیش‌لری ممکن‌لیگی باره‌سیده گپیردی. او ناتونی کیسکین ماموریت یوتوق‌لرینی تیکشیریشی‌نی تاکیدلب، افغان حربی کوچلرینی مالیوی جهت‌دن حمایت ایتیشی باره‌سیده قرار قبول قیله‌دی دیگن. اونگه کوره امریکانینگ افغانستان‌ده‌گی کوچلرینی 2016 ییل‌دن سونگ هم بو مملکت‌ده قالیشی احتمالی کته. حاضرگی کون‌ده ناتوگه اعضا دولت‌لرنینگ اون تورت مینگ کیشی حربی کوچلری افغانستان ایچکریسی‌ده کیسکین ماموریت چارچوبه‌سی‌ده خذمت قیله‌دیلر. افغان حربیلرینی تیارگرلیک‌دن اوتکزیش شونینک‌دیک اولرگه مصلحت‌لر بیریش ساحه‌سیده فعالیت آلیب باره‌دیگن مذکور کوچ‌لرنینگ کته قسمی‌نی امریکا حربی‌لری تشکیل ایته‌دی. اوندن کیینگ بریتانیا و آلمان حربی‌لری ناتوگه اعضا دولت‌لرنینگ افغانستانده کوپ سانلی حربی‌لری بار بولگن دولت‌لر سنله‌دی. بوندن آلدین باراک اوباما ماموریتی تامانی‌دن تصدیقلنگن جدول اساسیده امریکا حربی کوچلری نینگ کته قسمی‌نی جاری ییل نینگ آخری‌گه قدر افغانستان‌دن آلیب چیقیلیشی نظرده توتیلگن ایدی.
جان کری‌گه قره‌گنده رواجنلیب باره‌دیگن وضعیت امریکانینگ مینگلب کیشی عسکرلرینی نامعلوم بیر وقت‌گه چه افغانستانده قالیشی‌نی طلب قیله‌دی. او ناتونینگ کیسکین ماموریتی قچان اوز نهایه‌سی‌گه ییتیشی باره‌سیده گپیریش هم هلی انچه ایرته دیگن. بوندن آلدین هم امریکا و ناتونینگ افغانستان‌ده‌گی حربی قوماندان‌لری ناتو کوچلرینی افغانستان‌دن آلیب چیقیلیشی همده ناتو حربی‌لری سانی کمه‌یتیریلیشی باره‌سیده آگاهلنتیریب کیلگن‌لر. اولر هلی هم افغانستانده ترورچی گروه‌لر تهدیدلری اورته‌دن کیتمه‌گنی همده القاعده ترور ترماغی‌نی ینه بیر بارجانلنه یاتگنی باره‌سیده هم خبر بیرگن ایدی‌لر.
افغانستان حربی کوچلری قوشمه مرکزی باشلیغی جنرال قدم‌شاه شهیم یقینده ناتودن افغانستان اورشی‌گه نقطه قوییشی‌نی سوره‌گن ایدی.
ناتو افغانستانده کوزله‌گن مقصدلری‌گه ایریشدی می؟
امریکا و ناتونینگ مینگلب کیشی حربی کوچلری 2011 ییل سونگی‌ده خلق ارا ترورچی‌لر ترماغلری‌نی یوق قیلیش اوچون افغانستان‌گه باستیریب کیرگن ایدی‌لر. 2012 و 2013 ییل‌لر افغانستان ایچکریسی‌ده خلق ارا حربی کوچ‌لر همده افغانستان دولتی‌گه قرشی هجوم‌لر عمل‌گه آشیریلمه‌دی. در واقع مذکور ایکی ییل افغانستان نینگ تقریباً سونگی یریم عصرلیک تاریخی‌ده اینگ برقرار و آسایشته ییل‌لر ایدی. بیراق اوندن سونگ ایریم شهرلرده پارتلش‌لر، خودکش هجوم‌لر یوز بیره باشله‌دی. کیینگی اون ییل ایچیده مملکت بویلب جنگ جدل‌لر اوج آلدی، قطار تومن‌لر مرکزلری طالبلر اشغالی‌گه اوتدی. اوباما ماموریتی القاعده ترور ترماغی نینگ ییتکچی رهبری اسامه بن‌لادن پاکستان نینگ ایبت‌آباد منطقه‌سی‌ده قتل ایتیلگنی‌دن سونگ القاعده‌نی تاباره ضعیف لشیب باره یاتگنی نتیجه‌سیده امریکانینگ افغانستان‌ده‌گی حربی ماموریتی اوز نهایه‌سی‌گه ییتگنی خصوصیده هم گپیرگن ایدی. رسمی واشنگتن طالبان‌نی امریکا قوشمه ایالت‌لری دشمنی بولمه‌گنی باره‌سیده هم فکر یوریتگن ایدی‌لر. اوباما 2016 ییل آخری گچه امریکا حربیلرینی افغانستان‌دن آلیب چیقیشی باره‌سیده قرار قبول قیلدی. اوشبو ریجه اساسیده امریکا اوز حربی کوچلری نینگ کته قسمی‌نی افغانستان‌دن چیقردی.
2015 ییل یازی‌ده قندوز ولایتی مرکزی طالبلر اشغالی‌گه اوتیشی رسمی واشنگتن و ناتو رهبریتی‌نی هم قتیق چوچیتدی. اوشبو حادثه باعث امریکا و ناتو رسمی‌لری افغانستان‌نی هلی هم ترورچی‌لرنی منطقه‌ده افغانستان دولتی و دنیا هم جمعیتی منفعت لری‌گه ضربه‌لر بیریش امکانی‌گه ایگه ایکنی‌گه قیته ایشاندی‌لر. قندوز واقعه‌سیدن سونگ امریکا همده ناتونینگ افغانستان‌ده‌گی ماموریتی هلی اوز نهایه‌سی‌گه ییتمه‌گنی باره‌سیده کوپ گپیریله باشله‌دی.
بیر جهت‌دن آلیب قره‌لگنده امریکا و ناتوگه اعضا دولت‌لر اوتگن اون تورت ییل دوامی ده افغانستانده کته تلفات‌لر بیریب میلیاردلب دالر صرفله‌دیلر. موجود شرایط‌ده ناتو و غرب دولت‌لری اوچون افغانستان‌نی ترک ایتیش اینگ کته یوقاتیش سنله‌دی. ناتوگه اعضا دولت‌لر منطقه‌ده کوتیلمه‌گن پیمانه‌ده کوچه‌ییب باره یاتگن خلق ارا ترورچی ترماغ لرنی قیته جالنه آلمه‌یدیگن درجه‌ده ضعیف‌لشتیرمه گونگه قدر افغانستان‌نی ترک ایتیشی ناتو و غرب دولت‌لری نینگ افغانستان‌ده‌گی ماموریتی یوتوق‌لرینی تیز آره‌ده پوچگه چیقریشی ممکن.
امریکا رهبرلیگی‌ده افغانستان و منطقه بویلب ترورچیلیککه قرشی کوره‌ش آلیب باره دیگن دولت‌لر، افغانستانده اوز کوزله گن مقصدلری‌گه ییتیش‌لری اوچون بیرینچی‌دن افغانستان حربی کوچلرینی اوزاق مدتگه قدر هر تامانلمه حمایت ایتیش‌لری کیره‌ک. بروکسل‌ده اوتکزیله‌دیگن ناتونینگ نوبده‌گی ییغینی نینگ اساسی آجنداسی هم انه شو مساله گه قره‌تیلگن. افغانستان حکومتی نماینده‌لری مذکور ییغینده ناتو و غرب دولت‌لری نی اوزاق مدتگه چه رسمی کابلنی حمایت ایتیب باریشلری‌گه احتیاج بارلیگی باره‌سیده ایشانتیریش‌لری ضرور.
