د امریکا د بهرنيو چارو وزارت وايي چې د ملا عمر مړينه به دسولې په خبرو اترو کومه بده اغیزه ونه کړي.
دمتحده ايالاتو د بهرنيو چارو وزارت ویاند مارک ټونر په واشنګټن کې د خبري غونډې پر مهال وویل، چې اوس د وسله والو طالبانو سره ښه چانس دی، چې د افغان سولې له پاره هلو ځلو کې برخه واخلي.
ټونر زیاته کړه، چې د افغان سولې له پاره اوس مهال تر ټولو مناسب وخت دی او طالبانو ته پکار ده چې له دې موقعې استفاده وکړي.
د امريکا حکومت وايي، چې دوی لیواله دي په همدې شرایطو کې د سولې خبرې اترې مخکې لاړي شي.
مارک ټونر په خپلو خبرو کې دا ګوت څنډنه هم وکړه، چې اوس ټاکنه د طالبانو په لاس کې ده چې په جګړه کې پاتې کيږي او که د سولې د بهیر برخه ګرځي.
سرچينه زیاتوي، چې امریکا غواړي طالبان په افغان سوله کې خپل مثبت رول ادا کړي او له دې موقعې ګټه واخلي.
په همدې حال کې د چين د بهرنيو چارو وزارت ویاند لو کانګ هم په بیجینګ کې خبري ناستې ته وویل، د افغان سولې له ښکېلو غاړو غوښتنه کوي، چې د سولې خبرې اترې مخ ته یو سي او ځنډ په کې رامنځته نه شي.
چين حکومت زیاته کړې چې په سوله کې د ټولو افغانانو، ګوندونو او د سیمې د هیوادونو ګټه ده.
همدا ډول د چین د بهرنيو چارو وزارت ویاند زیاته کړې چې دوی په دې هڅه کې دي چې پاکستان وهڅوي او د سولې خبرې اترې پرمخ لاړې شي.
د امریکا دبهرنيو چارو د وزارت ویاند هم ویلي چې دوی غواړي پاکستان د افغان سولې په بهیر کې خپل اغیزمن رول ادا کړي.
امریکا او چین دوه هغه هیوادونه دي چې د سولې د خبرو په لومړي پړاو کې یې د څارونکو او مرسته کوونکو په توګه ګډون کړی و.
ټاکل شوې وه د افغان حکومت او وسله والو طالبانو ترمنځ د سولې دخبرو اترو دویمه ناسته د جولاي په ۳۱ یعنې نن د اسلام اباد په مري کې ترسره شي، خو تېره ورځ د طالبانو په غوښتنه د پاکستان حکومت ددې خبرو اترو دا لړۍ تر نامعلوم وخت وځنډوله او بیا د افغانستان دبهرنيو چارو وزارت هم خبر ورکړ، چې د سولې دخبرو دویمه ناسته ځنډېدلې.
اوس وکتل شي چې افغان سوله کې ښکیل اړخونه څنګه له ستونزمن پړاو تېريږي او درېدلې خبرې بیا پیل کړي؟
