ایچکی ایشلر وزیرلیگی نینگ ایتیشیچه، جمهورلیک ریاست بیرینچی اورین‌باسری امرالله صالح نینگ موترلری نی کاروانی گه اویوشتیریلگن هجوم‌ده ۱۰ کیشی هلاک و باشقه ۱۵ کیشی یره‌لنگن. جمهورلیک ریاستی نینگ بیرینچی اورین‌باسرلیک دفتری نینگ ایتیشیچه، بو هجوم مقصدی جمهوررئیس بیرینچی اورین‌باسری امرالله صالح ایکن.
جمهورلیک ریاستی نینگ بیرینچی اورین‌باسرلیک دفتری تامانیدن ترقه‌تیلگن اعلامیه‌ده کیلیشیچه، بو هجوم‌ده جناب صالح گه ضرر ییتیشمه‌گن.
مذکور هجوم بوگون (چهارشنبه ۱۹- سنبله) ایرته‌لب ساعت ۷:۳۵ اطرافیده کابل شهری نینگ ۴- خوفسیزلیک حوزه‌سیگه تیگیشلی تایمنی نینگ سابق تورت یولیده یوزبیرگن.
بو حادثه‌دن کیین جناب صالح صورتلی بیر پیام آرقه‌لی ایتیشیچه، بو حادثه‌ده نیچه قوروقچیسی یره‌لنگن.
جناب صالح گه کوره، اوشبو پارتلش‌ده او و اونینگ اوغلی ینگیل جراحت کوتارگن.
ایچکی ایشلر وزیرلیگی سوزلاوچیسی طارق آرین نینگ ایتیشیچه، مذکور هجوم عاقبتیده ۱۰ تینچ‌اهالی هلاک و جناب صالح نینگ قطار قوروقچی‌لری شامل ۱۵ کیشی یره‌لنگن. اونینگ کوپه‌یتیریشیچه، قربانیلر رقمی کوپه‌یشی نینگ احتمالی بار.
جناب آرین گه کوره، پارتلش نینگ قنده‌یلیگی توغریسیده تیرگاو باشلنگن.
حادثه مسئولیتی نی حاضرگچه بیرار گروه بوینیگه آلمه‌گن. طالبان گروهی بیر توییت یازیب، بو پارتلش اولرنینگ ایشی ایمس‌لیگی نی بیلدیرگن.
