.jpg)
د میوند قولې اردو د عامه اړیکو مرستیال احمد شکیل تسل سلام وطنداره ته وویل، چې تېره شپه د افغان کمانډو ځواکونو په ګډوعملیاتو کې د ملي اردو او ملي پولیسو ۶۰ تنه سرتېري د وسله والو طالبانو له منګولو خوشې کړل.
تسل وايي، چې دغه عملیات د هلمند ولایت نوزاد ولسوالۍ کې هغه مهال په بېړې پلان شول، کله چې د نیول شویو سرتېرو د ژوندیتوب خبر را ورسېد.
نوموړي وویل، د ازاد شویو سرتېرو رواني حالت ښه نه دي.
احمد شکیل تسل وايي، دا هغه سرتېري دي، چې څو اونۍ مخکې په سنګین ولسوالۍ کې ۶۵ سرتېري د وسله والو طالبانو له کلابندۍ وروسته نیولي وو.
په ورته وخت کې د هلمند ولایت نوزاد ولسوالۍ یو تن اوسېدونکی حضرت محمد سلام وطندار ته وویل، چې وسله والو طالبانو پر امنیتي پوستو د بریدونو په ترڅ کې د ملي اردو او ملي پولیسو زیات سرتېري اسیران نیولي دي.
دی وايي، چې دغه سرتېري اوسمهال د طالبانو له خوا د هلمند ولایت باغران ولسوالۍ ته لېږدول شوي دي.
دا په هلمند ولایت کې لومړی ځل دی، چې د افغان امنیتي ځواکونو له لوري د عملیاتو په ترڅ کې په دومره شمېر سره سرتېري د طالبانو له منګولو ژغورل کیږي.
تر اوسه پورې وسله والو طالبانو په دې اړه څه نه دي ویلي.
