کرکټ بورډ وایي چې د افغانستان کرکټ ملي لوبډله د انګلستان کرکټ بورډ لخوا لارډز لوبغالي ته ور بلل شوی وه.
د کرکټ بورډ اجرایوي مشر شفیق الله ستانکزي په خپل فیسبوک پاڼه کې لیکلي چې افغان لوبډلې د خپلو تمریناتو څخه په فرصت د انګلستان لارډز لوبغالي څخه لیدنه وکړه.
ښاغلي ستانکزی زیاتوي چې افغان لوبغاړو په لارډز تاریخي کرکټ لوبغالي کې د انګلستان او نیوزیلینډ کرکټ ملي لوبډلو ترمینځ د لومړۍ ټیسټ لوبې ننداره وکړه.
دیادونې وړ ده چې افغان کرکټ ملي لوبډلې د سکاټلینډ خلاف کېدونکي انټرکانټینینټل جام څلور ورځنۍ سیالۍ ته لا له وړاندې په انګلستان کې ۱۲ ورځني تمرینات نیولي دي.
د روانو تمریناتو په ترڅ کې افغان کرکټ ملي لوبډلې د بیلا بیلو تمریناتو ترڅنګ د (اکسفورډ) پوهنتون کرکټ لوبډلې ته هم په تمریني سیالۍ کې ماتې ورکړه.
په دې سیالۍ کی شهزاد محمدي د څه باندې یو کلن انتظار وروسته په ملي لوبډله کې ولوبیده په غبرګو سلیزو سره یې ۲۶۶ منډې جوړې کړې.
په سیالۍ کې افغان کرکټ ملي لوبډلې خپله سیاله د اکسفورډ پوهنتون لوبډله په ۲۹۶ منډو له ماتې سره مخ کړه او پدې سره یې سکاټلینډ ته د خطرزنګ واوروه.
د کرکټ بورډ لخوا د خپرو شویو معلوماتو له مخې چې ټاکل شویده افغان کرکټ ملي لوبډله به د انګلستان د روان تمریني سفرپه پای کې د انګلستان له (میډل سیکس) لوبډلې سره هم تمریني سیالۍ ترسره کړي.
د کرکټ نړیوالې شورا (ای سی سی) د پلان له مخې به ټاکل شویده افغان کرکټ ملي لوبډله به د روان (انټرکانټینینټل) جام څلور ورځنیو سیالیو لومړۍ لوبه د جون میاشتې په ۲ مه نیټه له سکاټلینډۍ لوبډلې سره په (سټرلینګ) ښار کې ترسره شي.
د کرکټ نړیوالې شورا د پلان له مخې به د روان انټرکانټینینټل جام سیالیو اتله لوبډله به په ۲۰۱۸ کال کې د ټیسټ کرکټ وروستي مقام لرونکې لوبډلې سره د ۲ ټیسټ لوبو ترسره کولو چانس ترلاسه کړي.
