.jpg)
د بنګله دېش، پاکستان او هندوستان په سوداګریزو کرکټ سیالیو کې له اخیستلو او لوبېدلو وروسته افغان لوبغاړي د نړۍ په څلورم لیګ کې د لوبېدو چانس لري.
د کریک انفو وېبپاڼې د معلوماتو له مخی، د ویسټ انډيز کربین پریمیر لیګ (سي، پی، ایل) سیالیو لومړني لېست کې د ۵ افغان لوبغاړو نومونه ثبت شوي دي.
په دې لوبغاړو کې د نبي عیسی خېل، راشد ارمان او نجیب الله ځدران ترڅنګ له نړیوال کرکټ ګوښه شوی د غوراوي کمېټې د اوسني مشر نوروزمنګل او اوسني کپټان اصغرستانکزي نومونه هم لېدل کېږي.
فرید هوتک سلام وطندار سره په خبرو کې وویل، ۵ واړه غوره شوي لوبغاړي د افغانستان کرکټ بورډ له خوا نه بلکې د خپلو ایجنټانو له خوا د دغو سیالیو لومړني لېست ته غوره شوي دي.
.jpg)
د نوموړي پر وینا، دغو سیالیو د افغان لوبغاړو غوره کېدل د افغانستان د کرکټ له پاره یو بل زیری دی او که د لوبډلو له خوا واخیستل شي؛ نو افغان کرکټ بورډ ورته د اجازې ورکړې مسولیت په غاړه لري.
دغو سیالیو ته بیا په لومړني لېست کې د افغانستان مشهوره چټک بېټسمین او ویکټ ساتونکی محمد شهزاد محمدي نوم نه لېدل کېږي.
د راپور له مخی، د سږ کال (سي، پي، ایل) سیالیو د لوبغاړو په لومړني لېست کې ۲۵۸ لوبغاړو نومونه ثبت شوي، چې ګډون کوونکې لوبډلې د خپلې خوښې لوبغاړي جذب کړي.
د افغان لوبغاړو ترڅنګ په دې ډله لوبغاړو کې له هندوستان پرته د 9 بشپړ غړیتوب لرونکو هېوادونو او د کاناډا، امریکې، عمان او ایرلینډ هېواد لوبغاړي شامل دي.
پاکستان ترټولو زیات ۴۶، اسټرالیا ۲۸، سریلانکا ۱۹، نیوزیلینډ ۱۷، سویلي افریقې ۱۶، انګلستان ۴، بنګله دېش ۴، زمبابوی ۴، ایرلینډ ۳، کاناډا ۲ خو د امریکې او عمان بیا یو، یو لوبغاړی دغو سیالیو ته معرفي شوي دي.
.jpg)
د ورکړل شویو معلوماتو له مخې، د سږکال (سي، پي، ایل) سیالیو د لوبغاړو اخیستنه د روانې مارچ میاشتې په ۱۰ نېټه په برباډوس جزیره کې ترسره شي.
د سږکال کربین پریمیر لیګ سوداګریزې شل اوریزه کرکټ سیالۍ به د سږکال اګست میاشتې په لومړۍ نېټه پیل او د سپټنمبر په ۹ نېټه به د اتلې لوبډلی په اعلان سره پای ته ورسیږي.
د ویسټ انډیز کربین پریمیر لیګ سیالیو له پاره د ۵ افغان لوبغاړو نومونه داسې وخت اعلانیږي، چې د بنګله دېش او پاکستان په سوداګریزو سیالیو کې له لوبېدو وروسته تېره میاشت د افغانستان د ۵ لوبغاړو له ډلې نبي عیسی خېل او راشد ارمان په ۳۰ او ۴۰۰ لکه هندۍ روپو د هندوستان لسم پړاو سترو سوداګریزو (ای، پي، ایل) سیالیو له پاره د دفاعي اتلې سن رایزرز حیدراباد لوبډلې له پاره لوبېدو ته واخیستل شول.
