د افغانستان فوټبال فدراسیون اعلان وکړ، چې د افغانستان فوټبال ملي لوبډلې مشر روزونکی ازربایجاني الاصله المانی " سلوان سکلیزیچ " یې له دندې ګوښه کړی دی.
د فوټبال فدراسیون له خوا خپره شوې خبرپاڼه کې ویل شوي دي، چې له افغان فوټبال ملي لوبډلې سره د الماني روزونکي دندې مثبتې پایلې نه لرلې او نوموړی، یې د افغانستان فوټبال ملي لوبډلې د وروستیو ناکامیو او خرابو لوبو له کبله له دندې ویستی دی.
سلوان سکلیزیچ د روان کال په فیبرورۍ میاشت کې د افغان روزونکي یوسف کارګر پر ځای د افغانستان فوټبال ملي لوبډلې مشر روزونکی وټاکل شو.
د نوموړي په روزنه کې افغانستان تراوسه ۵ نړیوالې او ۴ نړیوالې دوستانه سیالۍ ترسره کړي دي، چې په کې یوه دوستانه او یوه نړیواله سیالۍ ګټلې ده، یوه دوستانه لوبه یې برابره کړې ده، خو په ۵ لوبو کې یې ماتې خوړلې دي.
د افغانستان فوټبال فدراسیون له افغان فوټبال ملي لوبډلې سره د سلوان له هڅو ستاینه کړې ده او نوموړی یې یو پیاوړی روزونکی یاد کړی.
خبرپاڼه لیکي، چې ښایي له نوموړي څخه په راتلونکې بیا هم د افغانستان فوټبال د روزنې په موخه کار واخلي، خو اوسمهال ورته نوره اړتیا نه لري.
افغان فوټبال فدراسیون دغه راز ویلي دي، چې اوسمهال د فوټبال نړۍ له مشهوره او لومړۍ لیکې روزونکي سره په خبرو بوخت دي.
د فوټبال فدراسیون چارواکي زیاتوي، چې تمه لري ډیر ژر یو بل تکړه روزونکی د افغانستان فوټبال ملي لوبډلې د روزنې په موخه وګوماري.
د فدراسیون خبرپاڼه کې راغلي دي، چې دوی د افغانستان فوټبال د ښه والي او دغه راز د هیوادوالو د خوشحالیو په فکر دي او له همدې کبله یې د افغانستان فوټبال ملي لوبډلې د ښه کیدو او ښه ځلیدو په موخه د روزنې په برخه کې تغیرات راوستل.
د افغانستان فوټبال فدراسیون د خبرپاڼې له مخې چې ډير ژر به د افغانستان فوټبال ملی لوبډلې نوی روزونکی او دغه راز د لوبډلې سره مل فني ډله غوره کړي او د رسنیو پر وړاندې هیوادوالو ته معرفي کړي.
