د کندوز په کلای زال ولسوالۍ کې د امنیتي ځواکونو او طالبانو ترمنځ د نښتې په پایله کې د افغان امنیتي ځواکونو ولکې ته ورغله.
د لومړۍ لوا د ۲۰مې پامیر فرقې قوماندان جنرال راحت ګل وویل، چې دا ولسوالۍ سقوط ته نږدې وه، خو ښه و نن سهار مهال د طالبانو له ولکې خلاصه شوه.
د ده په خبره، دغې ولسوالۍ د دوه درېیو ساعتونو له پاره سقوط کړی و، خو خوشبختانه، چې نن سهار ۳ بجې یې بېرته له طالبانو نه ونیوله.
د ده په باور، اوسمهال طالبان له ښاره وړاندې په یو بل ځای کې موقعیت لري.
خو د کندوز ولایت امنیه قوماندان جنرال محمد قسیم جنګل باغ وايي، چې دې ولسوالۍ سقوط نه و کړی او همدا اوس ټوله ولسوالۍ د افغان امنیتي ځواکونو په ولکه کې ده.
د کندوز امنیه قوماندان وویل، چې په څلورو ورځو کې په دې نښته کې ۴۸ وسله وال طالبان وژل شوي دي او د کلای زال ولسوالۍ د امنیه قوماندان په ګډون څلور پولیس ټپیان شوي دي.
له دې سره هم مهاله یو شمېر امنیتي سرچینې وايي، چې طالبان د ولسوالۍ لېرو پرتو سیمو ته تښتېدلي دي او امنیتي ځواکونو ورسره په هماغو ځایونو کې نښتې پیل کړې دي. خو د امنیتي ځواکونو یو سرباز سلام وطندار ته وویل، چې اوس هم د دې ولسوالۍ نیمه برخه له طالبانو سره ده.
کلای زال د کندوز ختیځه شمال ختیځه ولسوالي ده، چې له تاجکستان هېواد سره ګډه پوره لري.
