افغانستان انسان حقلری ایرکین کمیسیونینینگ ینگی گزارشیده ایتیشیچه، قویاش 1388- ییل، حمل آییدن قویاش 1396- ییل، حوت آیینی آخریگچه قوراللی آتیشمهلر و ترورچیلیک هجوملر نتیجهسیده 64103 تینچ اهالی قربان بولگن و بو جملهدن (23130 کیشی هلاک و 40974 کیشی یرهلنگن).
اوشبو گزارش اساسیده، توپلم رقم گه 4779 عیال (7.5%)، 11465 باله (17.9%)، 33516 ایرکک (52.3%) دیر و باشقه 14344 کیشی (22.3%) نینگ کیملیگی حاضرگچه بیللی بولمهگن.
انسان حقلری ایرکین کمیسیونی گه کوره، اوشبو قربانلیکنینگ 69.8% عاملی دولتگه قرشی قوراللی عصیانچیلر و باشقه 10.7% عاملی امنیتی کوچلر و خلق ارا طرفدارلری تانیلگن. عین حالده، قالگن 19.5% عاملی حاضرگچه بیللی بولمهگن.
بوگون خبری بیر ییغینده اوشبو گزارشنی ارایه ایتیش چاغیده، انسان حقلری ایرکین کمیسیونی باشلیغی سیما سمرنینگ ایتیشیچه، ترورچیلیک و قوراللی آتیشمهلرنینگ قربانلری اوچون حکومتنینگ هیچ بیر حمایتی برنامهسی یوق دیر. اونگه کوره، شونینگدیک قوراللی آتیشمهلر و ناتینچلیکدن بدرغه بولگنلر حکومتنینگ دایمی یاردملریدن محروم قالگن.
اوشبو تدقیقات اشتراکچیلریدن 25% نینگ ایتیشیچه، هیچ بیر اداره تامانیدن حمایت بولمهگنلر و باشقه 36.6% ارایه ایتیلگن حمایهلرنی قانیقرلی ایمس دییدی.
مذکور گزارشده کیلیشیچه، قربان بولگنلر آتیشمه عامللری قولگه آلینیب جزالنیشی، زیانلر جبران ایتیلیشی و خوفسیزلیک تأمینلنیشینی سورهگن.
اوشبو تدقیقاتده افغانستاننینگ 30 ولایتیده 3129 کیشی بیلن صحبت قیلینگن.
بو تدقیقات اساسیده، قربان بولگن تینچ اهالی جملهسیدن 62% (1934 کیشی) نیچه زیاننی بیر زمانده کورگن.
انسان حقلری کمیسیونینینگ گزارشی اساسیده، اوشبو تدقیقات اشتراکچیلری تینچ اهالی قربانلیگینینگ عاملینی 47.5% طالبلر، 18% داعش، 1.4% حقانی ترماغی، 1.7% پاکستان کوچلری، 1.14% ایریم ترورچی گروهلر، 5.7% ناقانونی قوراللی کوچلر، 1.6% محلی پولیس، 1% پولیس، 3% ملی خوفسیزلیک کوچلری، 3.7% خلق ارا کوچلری، 8% مردمی کوچلر و باشقه 169% ناتانیش دیگن.
شونینگدیک، انسان حقلری کمیسیونینینگ ییغینیده «افغانستاننینگ ایرکینلیکنی سلب ایتیش مرکزلریده قیناق و زورهوانلیک» گزارشی ارایه ایتیلدی. اوشبو گزارشده ایتیلیشیچه، 1396- ییل، اوشبو کمیسیونده 79 قیناقلیک قضیه رویخطگه آلینگن. بو گزارش اساسیده، قیناقلیکدن کوپینچهسی قولگه آلینگن زمانده یوز بیرگن. عین حالده، باشقه ییللرگه نسبتن 96- ییلده قیناقلیک 22% کمهیگن.
قویاش 96- ییلده یوز بیرگن قیناقلیک جملهسیدن 62 قضیهنی عاملی پولیس و 13 قضیهنی عاملی ملی خوفسیزلیک کوچلری بولگن.
اوشبو گزارش اساسیده قیناققه سالینگن کیشیلر رقمی، 1391- ییلده 71 قضیه، 1392- ییلده 74 قضیه، 1393- ییلده 365 قضیه، 1394- ییلده 93 قضیه و 1395- ییلده 92 قضیه رویخطده آلینگن.
تیارلنگن گزارشده امنیتی کوچلردن محبوسلر بیلن شغللنهدیگن کیشیلرگه قیناقلیکنی منع قیلیش تعلیمات بیریلیشی سورهلگن و شونینگدیک، ملی خوفسیزلیک ریاستیدن محبوسلر مدافعه وکیللرگه قول تاپیشلری اوچون قانون زمان عیارلهنیشی طلب قیلینگن.
