افغانستان 16 یاش‌دن قویی فوتبال تیرمه جماعه‌سی، جنوبی‌آسیا جام بیلشوولری اوچون بنگله‌دیش سفر قیله‌دی. فوتبال فدراسیون خبرنامه‌سیگه کوره، بو بیلشوولر جاری ییل می‌آیی 9 ده باشلنه‌دی.
افغانستان 16 یاش‌دن قویی فوتبال تیرمه جماعه‌سی، اوچینچی مرته بو بیلشوولرده اشتراک ایته‌دی. بو بیلشوولر بنگله‌دیش‌نی سیل‌هیت شهریده اوتکزیلیشی ممکن. افغانستان فوتبال تیرمه جماعه‌سی «ب» گروهی‌ده نپال و مالدیف تیرمه جماعه‌لری بیلن اوینه‌یدی. بو بیلیشوولرنی بیرینچی گروهی‌ده هندوستان، سریلانکا و بنگله‌دیش تیرمه جماعه‌لری اوینه‌یدی.
اویین‌لر لایحه‌سیگه کوره، افغانستان فوتبال تیرمه جماعه‌سی، بیلشوولرنی تورتینچی کونیده مالدیف تیرمه جماعه‌سی مقابلی‌ده اوینه‌یدی و می‌آیی 14 ده افغانستان تیرمه جماعه‌سی ایکینچی اویی‌نی نپال تیرمه جماعه‌سی برابریده بولیشی ممکن.
ایتیش لازم، بو اویین‌لر می‌آیی 18 ده جنوبی‌آسیا جام اویین‌لری قهرمانی معلوم بولگنی‌دن کیین، یکونلنه‌دی.
