د اقتصاد وزارت مسوولان وايي، په افغانستان کې خلک تر ۶۵ کلنۍ د ژوند هیله لري. دوی وايي، د نفوسو او پراختیا په غونډه کې چې په ۱۹۹۴ کال په قاهره کې جوړه شوې وه، په افغانستان کې ژوند ته د خلکو هیلې لرلو کچه ۵۳ کلونه یاد شوي وو.
د اقتصاد وزارت مسلکي مرستیال محمداسماعیل رحیمي چې په ۲۰۱۹ کال کې د نړۍ وضعیت په اړه د خپاره شوي راپور او په روان کال کې د افغانستان د نفوسو په اړه جوړې شوې غونډه کې خبرې کولې وویل، تازه شمېرې ښيي چې په افغانستان کې خلک تر ۶۵ کلونو ژوند کولو ته هیلهمند دي.
د رحیمي په وینا، په بېلابېلو برخو کې د ښو خدمتونو وړاندې کول لامل شوي چې پهدې برخه کې د افغانانو سلنه لوړه شي.
هغه وايي، د افغانستان نفوس په ډېرېدو دی او د کورنۍ د تنظیم په پروګرامونو او د طبیعي سرچینو په ساتلو به په هېواد کې ډېر ژوند کولو ته د خلکو د هیلو کچه لوړه شي.
په همدې حال کې د ملي احصایې او معلوماتو ادارې مسلکي مرستیال حسیبالله موحد وايي، د افغانستان د نفوسو شمېر به په روان کال کې ۳۲،۲ میلیونو کسانو ته ورسېږي.
د اقتصاد وزارت او د ملي احصایې او معلوماتو ادارې شمېرې ښيي چې د هېواد ۵۰ سلنه نفوس له ۱۸ کلونو کمعمره کسان دي.
د دغو شمېرو له مخې، د زېږېدونکیو ماشومانو کچه په هره ښځه کې ۵،۳ ماشومان دي. دغه راز د واده کوونکیو نجونو منځنۍ کچه ۱۸،۵ کلونه او د هلکانو هم ۲۲،۹ کلونه دي.
