بیرلشگن ملت‌لر تشکیلاتی نینگ باله‌لردن حمایت قیلووچی اداره‌سی یا-ده یونیسف نینگ بیرخبرنامه آرقه‌لی اعلان قیلیشیچه، افغانستان و پاکستانده پولیوگه قرشی ایملش کمپاینی قیته‌دن باشلنگن. اوشبو تشکیلات نینگ ایتیشیچه، کرونا ویروسی سبب، بو ایکی مملکتده 50 میلیون باله اوشبو ایملش‌دن محروم قالگن ایدی.
بوگون "سه‌شنبه" یونیسف نینگ بیر خبرنامه آرقه‌لی ایتیشیچه، افغانستان 3 ولایتیده پولیوگه قرشی ایملش کمپاینی جولای آی‌ده قیته‌دن باشلندی و ایکینچی کمپاین جاری میلادی ییل‌ده باشلنه‌دی.
خبرنامه‌ده جنوبی آسیا بوییجه یونسیف نینگ منطقه‌وی باشلیغی جین گوف دن نقل قیلینیب یازیلیشیچه: «حیاتنی قوتقرووچی ایملش‌لر اونملی دیر. دنیا یشاوچی‌لری بیله‌دی‌لر کیم ویروس چیگره تانیمه‌یدی. بوتون باله‌لر مصون بولمه‌گن صورتده، هیچ‌بیر باله مصون بولمه‌یدی.»
باله‌لرنی ایملش فعالیت‌لر 2020- ییل مارچ آی‌ده کرونا ویروسی چیقگنی سبب، افغانستان و پاکستانده توخته‌تیلگن ایدی.
یونیسف نینگ ایتیشیچه، اوشبو مدت‌ده افغانستان‌ده 34 ناگرانلیک واقعه و پاکستانده 63 ناگرانلیک واقعه قید ایتیلگن.
خبرنامه‌ده کوپه‌یتیریلیشیچه، افغانستان بیرقطار منطقه‌لریده اویمه‌اوی ایملش ناممکن دیر و 1 میلیون باله‌نی اوشبو ایملش‌دن محروم قالیش‌لری ممکن. اوشبو تشکیلات عایله‌لردن باله‌لرنی واکسین قیلیش اوچون ساغلیک مرکزلرگه آلیب باریش‌لرینی سوره‌گن.
یونیسف نینگ ایتیشیچه، مربوطه مملکت‌لر، خلق ارا ساغلیک تشکیلات و باشقه بیرقطار تشکیلات‌لرنینگ یاردمی بیلن باله‌لردن مواظبت قیلیش‌گه تعهدلی.
یونیسف نینگ منطقه‌وی باشلیغی‌گه کوره: «کرونا ویروسی چیقگنیدن سونگ، ینگی قیین‌چیلیک‌لرنی تجربه قیلدیک. اوشبو کسل‌نی نابود قیلیش خصوصیده بولگن برنامه‌لر قیته باشلنه‌دی و هرنرسه کنترل میزده.»
اوشبو تشکیلات نینگ ایتیشیچه، پاکستانده ایملش برنامه‌لری توخته‌تیلگنی دن سونگ، ناگرانلیک کسل‌لر کوپه‌یگن.
پولیو یوقمه، ناگران قیلیووچی و اولدیرووچی کسل‌لیکلردن بیری دیر و ایملش آرقه‌لی، اوشبو کسللیک‌که توسیق بولیش احتمالی بار.
