بوگون «چهارشنبه» نمایندهلر کینگشی اعضالری، ینه بیر بار افغانستان و آمریکا خوفسیزلیک شرطنامهسینی بحث گه آلگنلر.
نمایندهلر کینگشی اعضالریدن بیرقطارینینگ ایتیشیچه، افغانستان و آمریکا خوفسیزلیک شرطنامهسی مملکت منفعتی گه دیر و یالغیز نمایندهلردن بیرقطاری، سیاسی حرکت و باج آلیش نیتی بیلن مذکور شرطنامه گه قیته تیکلهنیشینی ایستهیدیلر.
نمایندهلر کینگشی اعضاسی کمال صافینینگ ایتیشیچه، نمایندهلر کینگشی اعضالریدن بیرقطاری، سیاسی حرکت و باج آلیش نیتی بیلن افغانستان و آمریکا خوفسیزلیک شرطنامهسی توغریسیده غیر مسؤولانه فکر بیلدیرمسلری کیرهک.
بیراق، نمایندهلر کینگشینینگ بوگونکی ییغینینی رهبرلیک قیلگن بیرینچی اورین باسری همایون همایون نینگ ایتیشیچه، نمایندهلر کینگشی نینگ ایلگری ییغینیده افغانستان و آمریکا خوفسیزلیک شرطنامهسی توغریسیده آلینگن قرار مذکور شرطنامه لغو ایتیلیشی ایمس، بلکیم قیته تیکلهنیشی توغریسیده ایدی.
همایون گه کوره، اوتگن هفته نمایندهلر کینگشی اعضالریدن کوپینچهسی افغانستان و آمریکا خوفسیزلیک شرطنامهسیگه قرشی ایدی؛ حاضر بو شرطنامهدن حمایت قیلهدیلر.
بیراق، نمایندهلر کینگشینینگ اعضاسی گلالی نور صافی، اوتگن مذکور کینگش تامانیدن آلینگن قرارنی نصاب ییترلی بولمهگنی سبب قانون گه قرشی دییدی.
نمایندهلر کینگشی اعضالریدن باشقه بیری شکیبا هاشمینینگ ایتیشیچه، آمریکا خوفسیزلیک شرطنامهسینی امضاءلگن چاغیده، زمانهوی حربی جهازلرنی افغانستان حربی کوچلرینینگ اختیاریده قوییشی و دوشمن حرکتلریگه قرشی توریشی توغریسیده سوز بیرگن ایدی؛ بیراق اونگه کوره، بیریلگن سوزلردن هیچ بیری حاضرگچه عملی بولمهگن و شو یوزهدن بو شرطنامه گه قیته تیکلهنیشی لازم. نمایندهلر کینگشی اوتگن هفته کوپینچه آواز بیلن افغانستان و آمریکا خوفسیزلیک شرطنامهسی قیته تیکلهنیشی توغریسیده کیلیشگن ایدی. نمایندهلر کینگشینینگ اوشبو قراریدن سونگ، ملی بیرلیک حکومتینینگ اجراییه باشلیغی و جمهور رئیس نینگ ایکینچی اورین باسری، اوشبو خوفسیزلیک شرطنامه گه بولهدیگن قرشیلیک مملکت منفعتی گه بولمهگنینی بیلدیردیلر.
