اکتوبر نینگ 4 و 5 کونلری بلجیم پایتختی بروکسل شهریده دنیا نینگ 70 مملکتی و 20 گه یقین خلق ارا تشکیلاتلری نمایندهلری اشتراکیده مهم خلق ارا ییغین اوتکزیلدی. اوشبو ییغینده جمهور رییس دوکتور محمد اشرفغنی باشچیلیگیده افغانستان بلند مرتبهلی رسمی هیئی هم قتنشگن ایدی. ییغین در حقیقت اروپا بیرلشمهسی و افغانستان میزبانلیگیده اوتکزیلدی.
افغانستان هیئتی بروکسل کنفرانسیگه بیر نیچته مهم سندلر جملهدن افغانستان اوزینی اوزی باقیش ملی ستراتیژیسی، آست قورمهلر نی رواجلنتیریش، عیاللر قابلیتلرینی آشیریش، شهرلرنی رواجلنتیریش و افغانستان و دنیا ارا حساب -کتاب بیریش حجتلرینی تقدیم ایتدی.
افغانستان رهبرلری جمهور رییس اشرف غنی و اجرائیه ادارهسی باشلیغی دوکتور عبداللهعبداللهلر بروکسل ییغینی نتیجهلرینی خوش قرشیلب اونگه کته اهمیت بیرگنلر.
دونر دولتلر بروکسل ییغینیده افغانستانگه کورسته دیگن یاردملری میزانینی کمهیتیرمس لیکلری بارهسیده تاکیدله دیلر. اروپا بیرلشمهسی نینگ خلق ارا یاردملر بوییچه مسوولی ته ون میمکیا «حاضرگی کونده افغانستانده سرمایه یاقیزیشیمیزنی کمه یتیریش وقتی ایمس» دیگن. شونینگدیک اروپا بیرلشمهسی نینگ تشقی ایشلر بوییچه مسوولی فریدریک موگرینی، افغانستانده سرمایه یاتقیزیش در حقیقت اروپانی امنیتینی تامینلش و رواجلنتیریشی اوچون سرمایه یاتقیزیش دیمک دیر دیدی.
افغانستان حامیلری بروکسلده 2020 ییلگه قدر افغان خلقی و دولتیگه 15 میلیارد دن آشهراق دالر کومک بیریشلری بارهسیده وعده بیردیلر. مذکور مبلغ افغانستانده برقرارلیکنی تامینلش، رواجلنیش، مخدر مادهلرگه قرشی کورهش، یخشی حکومتدارچیلیک و دموکراسینی رواجلنتیریش کبی ساحهلرده صرفلنهدی.
وعده بیریلگن کومکلر :
بروکسل ییغینیده قتنشگن دونر دولتلر کیلهسی تورت ییل دوامیده افغانستان دولتیگه اوز یاردملری مقدارینی اعلان ایتدیلر:
آلمان دولتی 1.7 میلیار دالر یاردم کورستیشی توغریسیده وعده بیردی. رسمی بیرلین اوز یاردملری اوچون افغان مهاجرلرنی اوز وطنلریگه قیتهریش همده فسادگه قرشی نتیجهلی کورهش آلیب باریش شرطینی اورتهگه قویگن.
بریتانیا بیر میلیارد دالر یاردم کورستهدی، شونینگدیک هندوستان دولتی هم بوندن آلدین کیلهسی تورت ییل دوامیده افغانستان دولتیگه بیر میلیارد دالر کومک قیلیشینی بیلدیرگن ایدی.
پاکستان دولتی هم تورت ییل جریانیده افغانستانگه 500 میلیون دالر ییتکزیب بیریشی همده اوچ مینگ کیشی افغانلر فرزندلریگه تحصیل بورسلری اوچون زمینه یرهتیشی توغریسیده وعده بیرگن.
جاپان دولتی ایچکی مهاجرلر اوچون 500 میلیون دالر همده افغانستاننی رواجلنتیریش ساحهسیده 400 میلیون دالر کومک قیلیشینی تاکیدلهگن.
تورکیه تامانی هم 2020 – ییلگه چه 600افغانستانگه میلیون دالر یاردم کورستهدی. سعودی عربستانینینگ بیرگن وعدهسی 100 میلیون دالر نی تشکیل ایتهدی.
ناروی مملکتی افغانستانده سیلاولر تیزیمیگه اصلاحاتلر کیریتیش همده سیلاولر اوتکزیلیشی شرطی بیلن 87 میلیون دالر یاردم کورستیشی بارهسیده وعده بیرگن.
امریکا دولتی هم 700 میلین دالردن آشه مبلغنی افغانستان حربی کوچلرینی جهازلنتیریش ساحهسیده یارم کورستیشینی بیلدیرگن.
بروکسل ییغینیده افغانستانگه کورسه تیلگن همکارلیک بارهسیده بیریلگن وعدهلر ملی بیرلیک حکومتی و افغانستان خلقی اوچون مهم یوتوق حسابلنهدی. دنیا افغانستانگه 15 ییلدن بیری میلیاردلب دالر یاردملر ییتکزیب بیردی. مذکور یاردملر بوکونگه قدر هم افغانستان خلقی همده دنیا جامعهچیلیگی نقطه نظریده معقول بیر شکلده صرفلنمهگن. در واقع اوشبو یاردملر مملکتده دولت اداره لریده فساد نینگ اوج آلیشیگه آلیب کیلگن.
امریکا دولتی نینگ افغانستاننی قیته قوریش ساحهسیده صرفلنه دیگن مبلغلرینی تیکشیریش بوییچه مخصوص ادارهسی "سیگر" اوتگن ییللر جریانیده افغانستان ایچکریسیده دونر دولتلر اینیقسه امریکا تامانیدن کورستیلگن یاردملر نینگ معلوم قسمی ایریم شخصلر و گروهلر چونتگیگه توشگنی بارهسیده بیر نیچه مرته حسابات ترقتگن ایدی.
بروکسل ییغینیده هم قطار دولتلر مملکتده فساد نینگ آلدینی آلیش و کورسه تیلگن یاردملرنی توغری و شفاف بیر شکلده صرفلنیشی ضرورتی اوستیده تاکیدله گنلر. بو خصوصده افغانستان دولتی و ملی بیرلیک حکومتی بیرینچی مسوول مرجع حسابلنهدی. افغانستاننی باشقره دیگن دولتدارلر بیر نرسهنی یخشی تونیشلری لازم که دنیا نا معلوم وقتگهچه افغانستاننی باقه آلمهیدی.
انه شو باعث مملکتده فساد ایلدیزلرینی قوریتیش، افغانستاننی اوزینی اوزی باقه آلیش سیغیمی و ظرفیتیگه ایگه قیلیش اوچون اساسی چارهلر کوریشلری کیرهک. و بو آره ده مملکتده برقرارلیکنی تامینلش، اجتماعی عدالت و یخشی حکمتدارچیلیکنی عملده تطبیق ایتیش اساسی شرطلردن سنهلهدی.
