هرات ولایتی محلی مسؤوللری نینگ ایتیش‌لریچه، اوتگن کون ایران نینگ چیگره کوچلرینی یامان یانده‌شیش‌لری باعث، دریاده غرق بولیب و جان بیرگن 50 مهاجردن 12 ته‌سی نینگ جسدی تاپیلگن، 30 ته‌سی سالم چیققن و باشقه 8 ته‌سی نینگ جسدی درک‌سیز یوقالگن.
سلام‌وطندارگه صحبت بیرگن گلران ولسوالی عبدالغنی نوری نینگ ایتیشیچه، اوشبو مهاجرلر ذولفقار دهانه‌سیدن ایران توپراغی گه کیریشگن، بیراق ایران نینگ چیگره کوچلری «بیل و انبر» بیلن اولرنینگ جانی توشیب و قورال بیلن اولرنی هریرود دریاسیده غرق قیلگن. جناب نوری گه کوره، منطقه اهالیسی نیمروز ولایتی نینگ بیر قسمتی گه قدر دریانی تیکشیریشگن، بیراق قالگن جسدلردن هیچ بیر اثر تاپیشمه‌گن.
هرات ولایتی نینگ محلی اداره‌سی تامانیدن اوشبو ماجرا تیکشیریلیشی اوچون بیر هیأت منطقه یوباریلگن.
ایران نینگ چیگره کوچلرینی اوشبو دهشت‌لی یانده‌شیش‌لری گه قربان بولگن‌لر هرات، غور و کابل یشاوچیلری بولیشگن.
هرات ولایتی نینگ حوزه‌یی کسلخانه‌سینی باش طبیبی عارف جلالی نینگ ایتیشیچه، اوشبو واقعه ده یره‌لنگن ایکی کیشی نینگ وضعیتی یخشی بولگن. اونگه کوره، یوز بیرگن واقعه دن 5 جسدی و 2 یره‌لی مذکور کسلخانه گه انتقال بیریلگن.
هرات ولایت کینگشی اعضاسی وکیل‌احمد کروخی، مرکزی حکومت دن تنقید قیلیب ایتیشیچه، حاضرگه‌قدر اوشبو فاجعه تیکشیریلیشی اوچون بو ولایت گه هیچ بیر هیأت تعیین ایتیلمه‌گن.
اوشبو واقعه دن قوتیلگن مهاجرلرنینگ سلام‌وطندارگه ایتیش‌لریچه، سانلری 57 کیشی گه ییتیشر ایکن و بو آره‌دن 23 کیشی جان بیرگن. اولرگه کوره، ایران نینگ چیگره کوچلری، اولرنی «دریاگه تشلش‌لری یا-ده آتیب اولدیریلیشی توغریسیده آگاه‌لنتیرگن.» اوشبو مهاجرلر غرق بولیش‌دن آلدین بیر کیچه-کوندوز ایران نینگ چیگره کوچلرینی قماغیده ایکن.
هرات حاکمی سوزلاوچیسی جیلانی فرهاد، افغانستان مهاجرلری بیلن ایران نینگ چیگره کوچلری یامان یانده‌شگنینی تصدیقلب ایتیشیچه، بو توغریسیده تیکشیروولر باشلنگن.
بیراق، هرات ولایتی بوییچه ایران قنسولی، بیر خبرنامه نشر قیلیب افغانستان مهاجرلریدن 57 ته‌سی قولگه آلینیب و اولر غرق بولگنینی رد قیلیب ایتیشیچه، بو واقعه ده ایران نینگ پولیسی‌نی قولی بولمه‌گن.
