افغان فوټبال فدراسیون په خپله رسمي ویبپاڼه کې اعلان کړی، چې ټاکل شوې ده د روان کال په اکتوبر میاشت کې به له مالیزیایۍ فوټبال ملي لوبډلې سره یوه نړیواله دوستانه سیالۍ ترسره کړي.
د یادې سیالۍ خبر تیره میاشت د مالیزیا فوټبال فدراسیون له خوا هم ورکړل شوی وو، خو وروستۍ پریکړه یې د خپلې فوټبال ملي لوبډلې روزونکي ته پریښې وه.
د افغانستان فوټبال فدراسیون د یوې خبرپانې په خپرولو سره وایي، چې د افغانستان او مالیزیا فوټبال ملي لوبډلو ترمینځ دغه دوستانه سیالۍ به د افغانستان او لبنان فوټبال ملي لوبډلو ترمینځ د سیالۍ وروسته ترسره شي.
د ورکړل شویو معلوماتو له مخې، دا به له ۲۰۰۸ م ز کال وروسته د افغانستان فوټبال په تاریخ کې لومړې ځل وي، چې له مالیزیایۍ فوټبال ملي لوبډلې د اکتوبر په ۱۱ مه نیټه د لوبې ډګر ته وځي.
د فوټبال فدراسیون له خوا د ورکړل شویو معلوماتو له مخې، سیالۍ به د مالیزیا په پلازمینه کولالمپور فوټبال نړیوال لوبغالي کې د افغانستان په وخت مازدیګر ۳ بجې ترسره شي.
دغه راز، تیره میاشت افغان فوټبال فدراسیون د روان کال سبټمبرمیاشتې په ۵ مه نیټه د لومړي ځل له پاره د لبنانۍ فوټبال ملي لوبډلې سره د دوستانه نړیوالې سیالۍ خبر هم ورکړ.
دیادونې وړ ده چې تراوسه د مالیزیا فوټبال فدراسیون او دغه راز فوټبال نړیوالی شورا په رسمي پاڼو کې د دغو سیالیو خبر نه دی ورکړی.
د یادونې وړ ده، چې د څوو میاشتو راهیسې افغان فوټبال ملي لوبډله هیڅ کومه نړیواله یا دوستانه نړیواله سیالۍ نه ده ترسره کړې او له همدې کبله په نړیواله درجه بندۍ کې ۱۵۶ م مقام ته غورځول شوې ده.
همدارنګه دفوټبال نړیوالې شورا په نوې اعلان شوې درجه بندۍ کې مالیزیایۍ فوټبال ملي لوبډلې له یوه درجه مخکیوالې ترلاسه کړې او ۱۷۳ م مقام ته رسیدلې ده.
