ټاکل شوې ده د افغانستان کرکټ ملي لوبډله د اسټرالیا په کوربتوب د ۲۰۱۵ کال کرکټ نړیوال جام سیالیو د پرانیستې په مراسمو کې برخه واخلي.
د کرکټ نړیوالې شورا د معلوماتو له مخې چې پیلیدونکي نړیوال جام سیالۍ د اسټرالیا او نیوزیلینډ په کوربتوب ترسره کېږي او دواړه هیوادونه به د سیالیو ځانګړې جلا جلا پرانیستې مراسم ترسره کړي.
د افغانستان کرکټ ملي لوبډلې منیجر بشیرستانکزي له اسټرالیا څخه سلام وطندار راډیو ته وویل چې ټاکل شوې ده د نړیوال جام د پرانیستې ستر مراسم د فیبروۍ میاشتې په ۱۲ مه نیټه په (ملبورن) ښار کې ترسره شي چې په کې به دافغانستان په ګډون نورې لوبډلې هم برخه ولري.
دغه راز د ورکړل شویو معلوماتو له مخې چې شریک کوربه نیوزیلینډ به د نړیوال جام سیالیو د پرانیستې مراسم په (کرایسټ چرچ) ښار کې ترسره کړي.
دغه راز ویل کېږي چې د نورو کپتانانو په څیر به افغان کپتان محمد نبي عیسی خیل د انځورونو په ویستلو مراسمو کې هم برخه واخلي.
د کرکټ ملي لوبډلې مدیر(منیجر) بشیرستانکزي زیاته کړه چې افغان کرکټ ملي لوبډله به په خپل (لومړي) ګروپ کې د رسمي او دغه راز ددویم ګروپ (هندوستان او عربي اماراتو) کرکټ ملي لوبډلو سره د رسمي تمریني سیالیو وړاندې د اسټرالیا له کلبونو سره ۲ تمریني سیالۍ هم ترسره کړي.
د نوموړي په وینا چې اوس مهال افغان کرکټ ملي لوبډله په اسټرالیا کې د خپلو روزونکو تر روزنې لاندې تر تمریناتو لاندې ده.
بشیرستانکزي زیاته کړه چې افغان کرکټ ملي لوبډله د رسمي او تمریني سیالیو وړاندې د فیبرورۍ په ۴ مه نیټه او ۶ مه نیټه دوه تمریني سیالۍ ترسره کړي.
ددی سیالیو وروسته به افغان کرکټ ملي لوبډله له هندوستان او عربي اماراتو سره په تمریناتي سیالیو کې خو د فیبرورۍ له ۱۸ مې نیټې څخه د مارچ تر ۱۳ مې نیټې به د نړیوال جام په رسمي سیالیو کې د بنګله دیش ، سریلانکا ، سکاټلینډ ، نیوزیلینډ ، انګلستان او اسټرالیا لوبډلو سره په ګروپ لوبو کې لوبې ترسره کړي.
