اسلامی حزب رهبری گلبدین حکمتیارنینگ باسقین‌لری نتیجه‌سیده، جمهورلیک ریاستی یاشیرین بیر ییغینده، کابل و باشقه نیچه ولایت‌ده اسلامی حزب گه ییر بیریش خصوصیده قرار قیلگن.
سلام‌وطندار تامانیدن قولگه کیریتیلگن حجت گه کوره، 15/ 12/1396 تاریخی جمهورلیک ریاستیده جمهورلیک ریاستی و ملی خوفسیزلیک کینگشی، محلی ارگانلر، مدافعه وزیرلیگی، مهاجرلر وزیرلیگی، اجتماعی ایشلر وزیرلیگی، باشکینت زونی ترقیات اداره‌سی، افغانستان ییر بوتونلیگی اداره‌سی، کابل شهردارلیگی و شهر قوریش وزیرلیگی نماینده لری اشتراکیده یاشیرین بیر ییغین اوتکزیب، کوه قروغ منطقه‌سینی ییرلرینینگ مکتوبی اسلامی حزب آتی گه توزه‌لیب و بو مکتوب ملی خوفسیزلیک کینگشی و نظارت و پارلیسی اورین باسرلیگی گه یوباریلیشی توغریسیده قرار قیلگن.
13/12/1396 تأریخی‌ده باشکینت زونی اداره‌سی آرقه‌لی ملی خوفسیزلیک کینگشی گه یوباریلگن جمهورلیک ریاستی‌نینگ 1869 رقم‌لی مکتوبی‌ده بونده‌ی دییلگن: «کوه قروغ ییرلری توغریسیده جمهورلیک ریاستی مقامی بونده‌ی بویروغ بیره‌دی: شهر قوریش وزیرلیگی، باشکینت زونی اداره‌سی و کابل شهردارلیگی‌دن صلاحیت‌لی هیأت تعیین قیلینگن و ایسلنگن منطقه‌نی تیکشیرسین و اسلامی حزب اعضالریگه ییر ترقه‌تیلسین و او ییردن فایده‌لنسین.»
شونینگدیک، بو مکتوب ده ایتیلیشیچه، «16/12/1396 تأریخی‌ده افغانستان ییر بوتونلیک اداره‌سی ایمیل آرقه‌لی سوولنتیریش و چارواچیلیک وزیرلیگی‌گه تیگیشلی لغمان ولایتیده بولگن 30 جریب ییر و جلال‌آباد ده بولگن 20 جریب ییرنی نظارت و پالیسی اورین باسرلیگی‌گه و شونینگدیک، لغمان ولایتیده بولگن باشقه 5 جریب ییرنی اسلامی حزب رهبرلیگی مقامی اوچون نظرگه آلینگن و افغانستان ییر بوتونلیک اداره‌سی اجرایی گزارشی‌نی نظارت و پالیسی اورین باسرلیگی و ملی خوفسیزلیک کینگشی بیلن شریک قیلگن.»
اوشبو حجت‌ده اسلامی حزب‌دن کادرلری‌نینگ کیم‌لیک‌لرینی ذکر قیلیب وزیرلیک‌لر و دولتی اداره‌لرگه یوباریشینی سوره‌لگن و قراردادی شکلده ملکی بست‌لرده جذب ایتیله‌دی.
آتی فاش ایتیلیشی‌نی ایستمه‌گن بیر منبع‌نینگ ایتیشیچه، دارلامان و کوه قروغ منطقه‌لریده دولتی ییرلر افغانستان اسلامی حزبی گه ترقه‌تیلیشی خصوصیده، قرار قیلینگن.
مذکور منبع‌نینگ ایتیشیچه، جمهولیک ریاستی، پالیسی، نظارت و تیکشیریش اورین باسرلیگی، ملی بیرلیک حکومتی‌نینگ اسلامی حزب بیلن بولگن شرطنامه‌سی‌نینگ تحقیقاتی و حجتی ملی خوفسیزلیک کینگشی‌گه تاپشیریلگن.
اوشبو گزارش‌ده حکومت رسمی‌لری‌نینگ فکرینی اورگه‌نیش اوچون سعی و حرکت قیلدیک، بیراق بو خصوصده سوزلشووگه حاضر بولمه‌دیلر.
عین حالده، نماینده‌‌لرکینگشی‌نینگ بیرقطار عضالری، اسلامی حزب‌گه ییر توزیع بولیشی اساسی قانون‌گه قرشی دیگن‌لر. اولرنینگ ایتیشیچه، مذکور منطقه‌ده ییر توزیع بولیشی قومی تارتیشوولر‌گه سبب بوله‌دی.
نماینده‌لرکنیگشی‌نینگ اعضاسی جعفر مهدوی‌نینگ ایتیشیچه: " دولت ملی منفعت‌لرگه قرشی کوه قروغ ساحه‌سیده حکمتیار حزبی‌گه ییر توزیع قیلگن و اساسی قانون و حزب‌لر قانونی‌گه دولت نینگ حزب‌لرگه ییر توزیع قیلیشی کیلگن ایمس"
اونینگ ایتیشیچه، اسلامی حزب‌گه توزیع بولگن ییرلر اهالی نینگ ملکیتی دیر و اولرنینگ حجت‌لری باش محکمه، بلدیه و عدلیه وزیرلیگی تامانیدن تصدیق لنگن. شو یوزه‌دن دولت‌نینگ بو ییرلرنی سیاسی بیر حزب‌گه بیریش اوچون ترقه‌تیش گه حقلی ایمس دیر.
نماینده‌لرکینگشی نینگ بیرینچی اورین باسری همایون همایون نینگ ایتیشیچه،اوشبو ییرلر نیازی بولگن کیشی‌لرگه توزیع بولیشی کیره‌ک و بیر منطقه‌ده بیر حزب‌گه ییر توزیع بولیشی قومی قیین‌چلیک نی اورته‌گه کیلتیره‌دی. او، جمهور رییس‌دن اهالی و دولت نینگ ییرلری‌نی حزب‌لر یا-ده کیشی‌لرگه توزیع بولیشی‌گه توسیق بولیشی‌نی سوره‌یدی.
اسلامی حزب و حکومت آرسیده امضا ایتلگن شرط نامه گه کوره، پاکستان و ایران گه بدرغه بولگن اسلامی حزب طرفدالریگه یشش زمینه‌سی یره‌تیب و ییر توزیع قیلیشی لازم.
