901 مرکزده حاضرگهقدر آواز بیریش جریانی باشلنمهگن
سیلاو ایرکین کمیسیونی مسؤوللری نینگ ایتیشیچه، مملکت بویلب 4041 مرکزده آواز بیریش جریانی دوام ایتماقده.
بوگون «شنبه» کابلده خبری ییغین اوتکزگن سیلاو ایرکین کمیسیونی سوزلاوچیسی عبدالعزیز ابراهیمی نینگ ایتیشیچه، سیلاو کمیسیونی جمهورلیک ریاست سیلاوی یولگه قوییلیشی اوچون 4942 آواز بیریش مرکز ریجهلگن ایکن و بو جملهدن 4041 مرکزده آواز بیریش جریانی دوام ایتماقده.
اونگه کوره، قطار ولایتلرده مخابراتی ترماقلرنینگ فعالیتی کیسیلگنی باعث، اولر 901 آواز بیریش مرکزنینگ آچیق و یاپیقلیگیدن خبرسیز قالگن.
بیراق، سیلاو ایرکین کمیسیونی نینگ کاتبلیک ادارهسی باشلیغی حبیبالرحمان ننگ نینگ ایتیشیچه، امنیتی ادارهلر تامانیدن بیریلگن رقم اساسیده، 5 مینگ 373 آواز بیریش مرکزدن 431 مرکز باغلیق دیر و مخابراتی ترماقلرنینگ فعالیتی کیسیلگنی باعث، باشقه بیرقطار مرکزلر بیلن علاقه قوره آلمهگنلر.
افغانستان جمهورلیک ریاست سیلاوی!
جمهورلیک ریاست سیلاوی اوچون آواز بیریش جریانی کیچ قورون ساعت 5 گچه دوام ایتهدی.
کابل بوییچه آلمان ایلچیخانهسی، آواز بیریش مرکزلرنی اوستیگه طالبان هجوملرینی قارهلهدی
کابل بوییچه آلمان ایلچیخانهسی نینگ رسمی تویتر صحیفهسیده یازیشیچه، «بیز آواز بیریش مرکزلر، آواز بیرووچیلر و آواز بیریش مرکزلرنینگ ایشلاوچیلری اوستیگه طالبان گروهی نینگ هجوملرینی قارهلهیمیز.»
کابل بوییچه آلمان ایلچیخانهسی اوشبو تویت ده کوپهیتیریشیچه، «دموکراتیک جریان گه توسیق بولیش و تینچ اهالی گه زیان ییتکیزیش هیچقچان قبول قیلینمهیدی.»
جوزجان سیلاوی
جوزجان پولیس قومندانی عبدالواحد وجدان نینگ ایتیشیچه، جوزجان ولایتی نینگ قرقین و درزاب تومنیده اوروش بولگنی سبب، هیچبیر آواز بیریش مرکز فعال بولمهگن. اونینگ ایتیشیچه، اوشبو آتیشمهلر اوتگن کیچه باشلنگن ایدی و حاضرگهقدر دوامی بار.
جوزجان پولیس قومندانی نینگ کوپهیتیریشیچه، حاضرده فیضآباد، مردیان و آقچه تومنلریده هم اوروشنی دوامی بار.
عینحالده، جوزجان ولایتی بوییچه سلاموطندارنینگ خبرچیسینی ایتیشیچه، اوشبو ولایت عیاللری کینگ شکلده سیلاوده اشتراک قیلگن
رحمتالله نبیل، حکیم تورسن و لطیف پدرام هم آواز بیریشدی
جمهورلیک ریاست سیلاوی نینگ نامزدلریدن بیری رحمتالله نبیل، کابل نینگ شش درک منطقهسیده جایلشگن آواز بیریش مرکزگه باریب آواز بیردی.
عین حالده، جمهورلیک ریاست سیلاوی نینگ نامزدلریدن باشقه بیری محمدحکیم تورسن، کابل شهری نینگ تایمنی منطقهسیده جایلشگن آواز بیریش مرکزگه باریب آواز بیرگن.
شونینگدیک، جمهورلیک ریاست سیلاوی نینگ نامزدی لطیف پدرام، نادریه مکتبی گه باریب آواز بیردی.
اشرف غنی و عبدالله عبدالله آواز بیردی
غنی و عبدالله آواز بیریش اوچون آوازبیریش مرکزلریده بارگن.
نیچه پیت آلدین جمهوررئیس محمداشرف غنی، امانی مکتبیده باریب اوز آوازینی صندوققه تشلهدی.
شونینگدیک ملی بیرلیک حکومت اجرایی باشلیغی عبدالله عبدالله، نادریه مکتبیده باریب اوز آوازینی استعمال قیلگن.
هرات ده آواز بیریش جریانی باشلندی
هرات ولایتیده بوگون ایرتهلب ساعت 7:30 ده آواز بیریش جریانی باشلندی.
هرات حاکمی اوز آوازینی استعمال قیلگنیدن کیین اوشبو ولایتدهگی برچه آواز بیریش مرکزلری نینگ خوفسیزلیگی تأمینلنگنیدن خبر بیریب و اهالیدن خواطرلنمسدن سیلاوگه اشتراک قیلیشلرینی سورهگن.
هرات پولیس قومندانی امینالله امرخیل نینگ ایتیشیچه، طالبان اوتگن کیچهدن بویان کشککهنه، کشکرباطسنگی، گلران تومنلری و کهسان تومنی نینگ ایریم بولیمیده سیلاولر پروسهسینی بوزیش اوچون حرکت قیلگن.
اونگه کوره، امنیتی کوچلر اوشبو حرکتلرنینگ آلدینی آلگن.
جناب امرخیل نینگ ایتیشیچه، طالبان هرات ولایتلریده مخابراتی ترماقلر فعالیتی نی کیسگن.
هرات بوییچه سیلاولر کمیسیونی باشلیغی داوود صدیقزاده نینگ ایتیشیچه، مذکور ولایتدهگی 300 آواز بیریش مرکزیدن 243 تهسی آچیق دیر و قتناو یوللرده جایلشگن باشقه 21 مرکزده مخابرتی ترماقلر فعالیتی کیسیلگنی باعث خبر یوق دیر.
اونینگ کوپهیتیریشیچه، پشتکوه و زیرکوه تومنلریده امنیتی تهدیدلر باعث سیلاو یولگه قوییلمهیدی.
بیرلشگن ملتلر تشکیلاتی: افغانستان سیلاویده ساختهکارلیک و زوروانلیککه اورین یوق دیر
بیرلشگن ملتلر تشکیلاتی نینگ باش کاتبی آنتونیو گوترش نینگ بیرخبرنامه آرقهلی ایتیشیچه، افغانستان سیلاویده«ساختهکارلیک، زوروانلیک و تهدید» قیلیشگه اورین یوق دیر.
بیرلشگن ملتلر تشکیلاتی نینگ باش کاتبیگه کوره، سیلاو لایحهسی جملهدن آواز بیریش مرکز، سیلاو ایشلاوچیلری و آواز بیرووچیلرگه قرشی هجوم قبوللنمهیدی.
جمهورلیک ریاستی سیلاوی نینگ آواز بیریش لایحهسی رسمی شکلده باشلندی
جمهورلیک ریاستی سیلاویده آواز بیریش لایحه بوگون "شنبه" ایرتهلب ساعت 7 ده رسمی شکلده سیلاو ایرکین کمیسیونی تامانیدن باشلندی.
سیلاو ایرکین کمیسیونی ارقامیگه کوره، مملکت بوییچه 5373 آواز بیریش مرکزدن 4928 مرکز آچیق دیر، بیراق باشقه 445 مرکز امنیتی تهدیدلر سبب، باغلنگن دیر.
جمهورلیک ریاستی سیلاویده 9 میلیون و 600 مینگ کیشی آتلرینی رویخط گه یازدیرگن.
اوشبو سیلاوده 18 کیشی اوزلرینی نامزد قیلگن ایدی، بیراق حنیف اتمر، زلمی رسول، نورالحق علومی، شیدا محمد ابدالی و محمد ابراهیم الکوزی سونگی کونلرده سیلاودن کنار کیتگن.
ایچکی ایشلر وزیرلیگی نینگ ایتیشیچه، مملکت بویچه امنیتی کوچلردن 72 مینگ تهسی سیلاو لایحهسی خوفسیزلیگینی تامینلش اوچون موظف بولگن.
