دوشنبه (8 قوس) کونی افغانستان نینگ آقینه بندر گاهیده افغانستاننی تورکمنستان تیمیر یولی ترماغی آرقلی آسیا و اروپا گه باغلهیدیگن تیمیر یول فعالیتگه باشلهدی. آقینه بندرگاهیده اویوشتیریلگن ییغینده ایکّی مملکت رهبرلری اشتراک ایتگن ایدیلر. افغانستان جمهور رییسی محمد اشرفغنی آقینه بندرگاهینی تورکمنستان تیمیر یولی ترماغیگه باغلنیشی افغانستان و تورکمنستان ارا علاقهلرنی مستحکملب، منطقه اقتصادی رواجلنیشی اوچون کته رول اوینهیدی دیدی:
«آقینه بندرگاهینی تورکمنستان تیمیر یولیگه باغلنیشی افغانستان و تورکمنستان ارا علاقهلرنی مستحکملب گینه قالمهی بلکه آسیا اقتصادیاتینی رواجنلنتیریش سَری تشلنگن اساسی بیر قدم سنهلهدی. بیز اوشبو تیمیر یول ترماغینی اروپا و آسیا بیلن علاقهلریمیزنی تامینلهیدیگن مهم بیر یول دیب بیله میز.»
جناب غنی اوز سوزلریده، افغانستاننی تیمیر یول ترماغی آرقلی اروپا و آسیا گه باغلنیشی نتیجهسیده بوندن تقریبا بیر عصر آلدین مملکت سابق قرالی امان الله خان نینگ آرزولریدن بیری عملده تطبیق ایتیلگنینی بیلدیردی. افغانستان رهبری یقین کیلهجکده مملکت ایچکریسیده تیمیر ترماغلرینی قوریش اوچون عملی چارهلر تدبیرلر کوریلیشینی تاکیدلهدی.
تورکمنستان رهبری قربان قلی بیردی محمد اوف اوز چیقیشیده آقینه – امام نظر- آته مراد تیمیر یولینی جنوبی آسیانی مرکزی آسیاگه همده اروپاگه باغلشده مهم کلیدی رولنی اوینهیدی دیدی:
«افغانستان و تورکمنستان ارا قوریلگن تیمیر یول منطقه بویلب کته اهمیتگه ایگه. اوشبو یول منطقه دولتلری ارا ترانزیت ساحهسیده قوله یلیکلرنی وجود گه کیلتیریب گینه قالمهی، بلکه یخشی بیر شکلده آسیا جنوبینی شمالیگه همده شرقینی غربیگه باغلب، اروپا و آسیا ارا ترانسپورت ترماغی فعالیتنی هماهنگ ایتیشده مهم رول اوینهیدی.»
بوندن بیر نیچه هفته آلدین تورکمن مهندسلری تورکمنستان نینگ امام نظر بندرگاهینی تیمیر یول آرقلی افغانستان نینگ آقینه بندرگاهی گه باغلهگن ایدیلر. آقینه بندرگاهی شمالی فاریاب ولایتی نینگ اندخوی تومنیده جایلشگن بولیب، بیر نیچه ییلدن بیری تورکمنستان، قزاقستان، تورکیه، آذربایجان همده ایراندن امپورت ایتیله دیگن تجاری توارلر آقینه بندرگاهی آرقلی افغانستان ایچکریسیگه آلیب کیلینهدی. اندخوی تومنی حاکمی سلطان محمد سنجر تورکمنستانلیک مهندسلرنی مذکور بندرگاه ده کمیده اوچ کیلو متر مسافهده تیمیر یول قوریب بیرگن لیکلرینی بیلدیردی. اونگه کوره تورکمنستان آقینه بندرگاهیدن اندخوی تومنی مرکزی آرهلیغیده 32 کیلو متر مسافهده تیمیر یول قوریب بیریشینی هم تاکیدلهدی
جناب سنجر مملکت شمالیده قوریله دیگن تیمیر ترماقلری خوفسیزلیگینی تامینلش اوچون ضروری چاره تدبیرلر کوریلیشینی بیلدیردی. تورکمنستان تیمیر یولینی افغانستان نینگ شمالی ولایتلری آرقلی تاجکستان همده ایران نینگ تیمیر یولی ترماقلریگه باغلنیشی ایتیلهدی. آقینه تیمیر یولی افغانستان شمالیده تیمیر یولی ترماغینی تاسیس ایتیش اوچون تشلنگن ایکینچی مهم عملی قدم حسابلنهدی.
بوندن آلتی ییل آلدین مملکت شمالیده ایلک بار اوزبیکستانلیک مهندسلر همکارلیگیده حیرتان بندرگاهی بیلن مزارشریف شهری آره لیغیده 75 کیلو متر مسافهده تیمیر یول قوریلگن ایدی. افغان رسمیلری مملکت شمالیده قوریله دیگن تیمیر یول ترماقلری خرجتی نینگ کته قسمی آسیا ترقیات بانکی تامانیدن توله نیلیشینی ایتهدیلر.
افغانستان حکومتی مملکت اقتصادینی تیکلش اوچون تیمیر یول ترماقلرینی قوریش اهمیتینی یخشی انگلهیدی البته. بیرینچی بار مملکت شمالینی تیمیر یول آرقلی مرکزی آسیا دولتلری قاله بیرسه ختای (چین) و اروپا گه باغلش اوچون عملی قدملر تشلنماقده. عین حالده شمال تیمیر یولی هرات و قندهار آرقلی پاکستان نینگ تیمیر یولی ترماغی بیلن باغلنهدی. افغانستان ایچکریسیده مذکور تیمیر یول ترماغلرینی قوریش ایشی اوز نهایهسیگه ییتیشی نتیجهسیده افغانستان همده منطقه دولتلری مناسبتلریده ایجابی اوزگریش یوز بیریشی کوتیلهدی. شونینگ افغانستان تیمیر یولی قوریلیشی منطقه اقتصادیاتینی ترقی ایتدیریشده انقلاب کیلتیرهدی. اوزاق ییللردن بیری اوزلوکسیز اوروشلر گردابیده تلپینه دیگن جفاکش افغانستانلیکلر حیاتینی یخشیلشده هم تیمیر یول ترماقلری ایجابی تاثیر اوتکزیشی کوتیلهدی.
افغانستان حکومتی برابریده مملکت ایچکریسیده تیمیر یول قوریش لایحهلرینی عملده تطبیق ایتیش اوچون امنیت مسالهسی اساسی توسیق سنهلهدی. حکومتنی اوز اقتصادی لایحهلرینی تیزراق عملده تطبیق ایتیش اوچون بیرینچیدن تورلی یوللر آرقلی مملکت ایچکریسیده امنیت مسالهسینی برطرف ایتیش اوچون ضروری چارهلر کوریشی کیرهک بولهدی.
