امنیتی رسمیلرنینگ ایتیشیچه، کندزنی قیته آلیش اوچون خوفسیزلیک کوچلر یولگه توشگن و بو ولایتنی طالبلر اوچون گورستانگه اوزگرتیریشلری ممکن. اوشبو رسمیلر کندز ولایتیده طالب لرنینگ ناملنگن والیسی مولوی سلام، اورین باسری ذبیح الله و باشقه 15 همراهسی بیلن اوتکن کیچه عملیات جریانیده هلاک بولگنیدن خبر بیرهدی. اولرنینگ کوپهیتیریشیچه، هلاک بولگنلر ایچیده طیبه گروهی جنگری مسؤوللریدن بیری حارث ناملی جنگریهم کورینهدی.
ملی امنیت ریاستی تامانیدن ترقهتیلگن خبرنامهده کیلیشیچه، اوشبو کیشیلر کندز هوایی قونلغه میدانی اوستیگه هجوم اویوشتیریشگه قصد قیلگن ایکن و امنیتی کوچلرنینگ هوایی هجومی نتیجهسیده سهشنبه کیچه ساعت 9 ده هلاک بولگن.
حارث، پاکستان پنجاب ایالتی یشاوچیلریدن بولیب، کندز ولایتیده طیبه گروهی قومندانی صفتیده فعالیت قیلر ایکن.
شونینگدیک خبرنامهده کیلیشیچه، مولوی سلام طالبلرنینگ عمومی قومندانی و کندز ولایتیده مذکور گروه نینگ ناملنگن والیسی ایکن. اونینگ اولیمی طالبان گروهی اوستیگه سلبی تأثیر تشلهگن. بیراق قوراللی طالبلر مولوی سلام و همراهلرینینگ اولیمینی رد ایتیب ایتیشیچه، اولر حاضر اوروش میدانیده بولگن.
اوتکن دوشنبه کون، طالبلر اوچ تاماندن کندز ولایتی اوستیگه هجوم اویوشتیرگن، نیچه ساعت جریانیده مذکور ولایت ایریم قسمتلرینی قولگه آلگن. عین حالده، امنیتی کوچلرنینگ ایتیشیچه، طالبان گروهی شکست ییماقده و تیزلیکده اولرنینگ قمراویده بولگن منطقهلر دولت قولیگه توشیشی ممکن.
شونینگدیک مملکت جمهور رییسی، اوتکن کون مذکور ولایتده جایلشگن امنیتی کوچلرگه تازهلش عملیاتلری جریانیده تینچ اهالینی خطرگه روپهره قیلمسلیکلرینی سورهدی.
