بوگون «جمعه» افغانستان-امریکا بیلیم یورتیدن 139 اوقووچی فارغ بولگن. اوشبو اوقووچیلر اداره و سوداگرلیک، تکنالوژی، اقتصاد و کپیوتر ساینس بولیملریدن فراغت حجت قولگه کیریتگنلر.
شو توغریده یولگه قوییلگن خاص مراسمده افغانستان بوییچه امریکا قوشمه ایالتلرینینگ ایلچیسی جان بس، افغانستانده آغاخان بنیادی نمایندهسی نورجهان موانی، افغانستان عالی اوقوو وزیرلیگینینگ سابق وزیری محمدشریف فایز و ایریم مملکتلرنینگ نمایندهلری اشتراک قیلگن.
افغانستان-امریکا بیلیم یورتی اوقووچیلرینینگ 8- دور فراغت مراسمیده مذکور بیلیم یورت باشلیغی کینت هالندنینگ ایتیشیچه، اوقووچیلرنینگ فراغتی افغانستان اهالیسی اوقیشگه قرشی توسیقلرنی کوتریش خصوصیده، سعی و حرکت قیلیشینی کورستهدی.
شونینگدیک، اوشبو مراسمده شریف فایزنینگ ایتیشیچه، بیلیم آلیش افغانستاننی ترقیات گه یوللهیدی و یاشلر مملکتنینگ اساسی سرمایهسی دیر. جناب فایزگه کوره، بوگون فراغت حجت قولگه کیریتگن اوقووچیلر، «ایرتهلیک کون اینگ یخشی مدیرلر دیر.»
افغانستان بوییچه آغاخان بنیادی نمایندهسی نورجهان موانی، سوزلرینی جریانیده اوقووچیلرنینگ آرهسیده عیاللر حضوریدن خرسندلیک بیلدیرگن. شونینگدیک، اوشبو مراسمنینگ سونگیده افغانستان-امریکا بیلیم یورتی تامانیدن نورجهان موانی گه افتخاری دکترا بیریلگن.
افغانستان-امریکا بیلیم یورتی، میلادی 2006- ییل، مارچ آییده قوشمه ایالتلرنینگ خلق ارا رواجلنتیریش ادارهسی یاردمی بیلن کابلده فعالیتگه باشلهدی. اوشبو بیلیم یورت ده تورت اساسی بولیم جملهدن اداره و سوداگرلیک، تکنالوژی، اقتصاد و کمپیوتر ساینس یانیده، انگلیس تیل کورسلری قوشیمچه اساسی مطالعه و صنعت بولیملریده تعلیمات بیریلهدی.
