قطر پایتختی دوحه‌ده افغانستان‌لیکلرارا سوزلشوولر باشله‌نیشی بیلن مملکتده اوروش شدت‌لنگن و هر کون قطار ولایت‌لرده امنیتی کوچلر و طالبان گروهی آره‌سیده آتیشمه یوز بیرماقده. ینگی‌لیکده طالبان گروهی قندوز، غزنی و ننگرهار ولایت‌لریده اوروش نی کوپه‌یتیرگن.
قندوز ولایتی کینگش اعضالری و یشاوچی‌لریدن قطاری نینگ ایتیش‌لریچه، طالبان نیچه کوندن بویان بو ولایت مرکزی و تومن‌لریده اوروش‌لرنی شدت‌لنتیرگن.
قندوز ولایتی کینگش اعضاسی امرالدین ولی نینگ سلام‌وطندارگه ایتیشیچه، طالبان گروهی نینگ سونگی هجوم‌لری باعث امنیتی کوچلر آغیر تلفات کورگن.
اونگه کوره، وضعیت شونده‌ی دوام تاپگن صورتده، قطار تومنلر و ولایت مرکزی طالبان نظارتی گه اوتیشی نینگ احتمالی بار.
۲۱۷ پامیر قول اردو قومندانلیگی سوزلاوچیسی عبدالهادی نظری نینگ ایتیشیچه، طالبان هجوم‌لرینی کوپه‌یتیریب امام‌صاحب و خان‌آباد تومن‌لری نی نظارت گه آلیش نیتی گه دیر.
اونگه کوره، مذکور تومن‌لرده امنیتی کوچلر و طالبان گروهی آره‌سیده یوزبیرگن آتیشمه‌لرده، طالبان گروهی گه آغیر تلفات ییتیشگن.
۲۱۷ پامیر قول اردو سوزلاوچیسی نینگ کوپه‌یتیریشیچه، حربی کوچلر مملکت شمال شرق زونی ده طالبان هجومی نی آرقه گه اوریش اوچون بوتون تیارگرلیگی بار.
قندوز حاکمی سوزلاوچیسی عصمت‌الله مرادی نینگ ایتیشیچه، محلی حکومت اوشبو ولایتده اوروش وضعیتی نی اوزگرتیریش اوچون سعی و حرکت قیله‌دی.
غزنی ولایتی کینگش باشلیغی نصیر احمد فقیری بو ولایتده اوروش وضعیتی توغریسیده خواطر بیلدیریب ایتیشیچه، طالبان غزنی ده نفوذلرینی کوپه‌یتیریش اوچون حرکت قیلماقده.
جناب فقیری گه کوره، طالبان آرقه‌لی شهر ایچیده ترورلر، ماین ییرلشتیریشلر کوپه‌یشی و حربی مرکزلر اوستیگه کیچه‌لی عملیات اویوشتیریش غزنی نینگ دهشت‌لی بیر شهرگه اوزگرتیرگن.
شونینگدیک ننگرهار حاکمی سوزلاوچیسی عطاالله خوگیانی نینگ ایتیشیچه، طالبان بو ولایتده آغیر تلفات کورگن. اونگه کوره، بو ولایتده طالبان جنگری‌لری نینگ اوروشی باعث ۲۹ طالب هلاک و باشقه ۲۰ طالب یره‌لنگن.
اونینگ کوپه‌یتیریشیچه، مذکور آتیشمه‌لرده امنیتی کوچلردن ۲۰ ته‌سی هلاک و باشقه ۱۵ ته‌سی یره‌لنگن.
افغانستان‌لیکلرارا سوزلشوولر باشلنگن بیرحالده، مملکت یشاوچی‌لری اوروش تامان‌لریدن هر دایم زوروانلیک‌لرنی کمه‌یتیریش‌لرینی سوره‌گن. افغانستان‌لیکلرارا سوزلشوولر اوتگن هفته شنبه کونی اوروش نی یکونلنتیریش اوچون دوحه‌ده باشلندی.
