بوگون رسمی مسکو، پاکستان و چین نماینده‌لری‌نینگ اوچ تامانلمه ییغنی‌گه میزبانلیک قیلدی. اوشبو ییغینده کوتیلگن خواطرلرگه ضد، اساسن افغانستانده امریکانینگ بارلیگی و بو مملکتده کون – ساین داعش حرکتی کوچی آشیشی محاکمه بولگن.
اوتگن کون افغانستان حکومتی بو ییغین باره‌سیده تشویش بیلدیرگن ایدی. کنفرانس‌گه چقیریلمه‌گن افغانستان حکومتی ییغین اشتراکچیلریدن بو حقده آچیقلیک بیریش طلبی بیلن چیققن ایدی.
مذکور ییغین نینگ کون ترتیبی هنوزگچه رسمن تصدیق ایتیلمه‌گن. لیکن، ایریم سیاسی تحلیلچیلر مسکو، اسلام آباد و پیکینگ افغانستان وضعیتینی محاکمه قیلگنلر دیدیلر.
سیاسی کوزه‌توچی محمد حیدری، روسیه، چین و ایران کبی دولتلر امریکانینگ حربی قوشینلری افغانستانده قالیشیدن قتیق تشویشده‌لر دیگن. بو مملکتلر اوچون ینه بیر معما سنلنگن اسلامی دولت گروهی (داعش) گه اشاره قیلگن جناب حیدری، مملکت نینگ ایریم ولایتلری و تومنلریده داعش توده‌سی جانلله‌نیب باریشی یوقاریده ایسه تیلگن دولتلرنینگ جدی خواطریگه باعث بولگن لیگینی تیلگه آلگن. مرکزی آسیا برقرارلیک برهم اوریلمس‌لیگی اوچون بو مملکتلر اوز ارا مذاکره قیلیشده حقلی‌لر دیگن سیاسی کوزه‌توچی.
.jpg)
جناب حیدری‌نینگ تعبیریگه کوره، امریکا قوشمه ایتالتلری‌نینگ اوزاق مددتگه قدر افغانستانده قالیشدن نیت موجود کوچدن فایده‌له‌نیب مرکزی آسیاده‌گی ییر آستی بایلکلرنی تصرف قیلیش. داعش توده‌سی نینگ پیدا بولگنی بو منبعلرگه ایریشیش نینگ باشقه بیر بولیمی بولیشی ممکن دیدی سیاسی تحلیلچی جناب حیدری. او، پاکستان بو ییغینده دلاللیک رولیده اوینیدی دیگن. اوشبو اولتیریش نینگ نتیجه‌سی « افغانستانده نیابتی اورشنی سقلب قالیش» دیگن تحلیلچی.
باشقه بیر تحلیلچی نظرمحمد مطمئن خوفسیزلیک، یره‌ش، امریکا حربیلری‌نینگ قالیشی و افغانستان‌ده‌گی سونگی اوزگریشلر ییغینده بحثگه آلینگن موضوعلردن حسابلنه‌دی دیگن.
اوشبو ییغین اوتکزیلیشی اوچون کوچلی احتمال بیلن طالبان تامانی خوشبین‌لیک کورستگن بولیشی ممکن دیگن جناب مطمئن. افغانستان ایشلریگه چین و روسیه نینگ اره‌له‌شیشی افغانستان حکومتی فایده‌سی بولیشی امکاندن اوزاق ایمس دیگن او.
اوتگن کون افغانستان تشقی ایشلر وزیرلیگی نینگ سوزلاووچیسی شکیب مستغنی، ییغین‌گه افغانستان دولتی‌نینگ نماینده‌سی چقیریلمه‌گن لیگنی اظهار ایتگن ایدی. وزیرلیک ییغیننی اویوشتیرگنلردن بو توغریسده ایضاح سوره‌گندی. جناب مستغنی تعبیریچه، مملکت نینگ نماینده‌سی اشتراکی‌سیز مسکوده افغانستان وضعیتینی اورگه‌نیش سوال توغدیروچی بیر گپ.
