ایرانده افغانستانلیکلرنی انتقال بیرهدیگن بیر موترنینگ اوت آلگنی عاقبتیده، 3 کیشی جان بیریب و باشقه 10 کیشی یرهلنگن.
مذکور حادثهدن حیاتده قالگن کیشیلرنینگ ایتیشیچه، اوشبو موتر ایران حربیلری نینگ اوققه توتیشی عاقبتیده اوت آلگن.
بو حادثهدن آلینگن ویدیو ده افغانستان یشاوچیلریدن بیری کویگن و اطرافیده بولگن کیشیلردن سوو ایستهیدی.
عینحالده، نمایندهلر کینگشی اعضالری و مدنی فعاللردن بیرقطاری اوشبو واقعهنی فاجعهلی عنوان قیلهدیلر.
نمایندهلر کینگشی اعضاسی حمیدالله حنیف نینگ ایران حربیلری نینگ افغانستانلیک مهاجرلرگه قرشی ظلملری خصوصیده حکومت نینگ جیم تورگنیدن تنقید قیلیب ایتیشیچه، اوشبو واقعهنی افغانستان حکومتی اینقسه تشقی ایشلر وزیرلیگی تامانیدن تیکشیریلیشی کیرهک.
اونینگ کوپهیتیریشچه، افغانستان یشاوچیلری نینگ ایران حربیلری تامانیدن دینگیزگه تشلهنیش موضوعی نینگ تیکشیریش نتیجهسی حاضرگهقدر بیللی بولمهگن.
هرات مدنی فعاللریدن بیری سیداشرف سادات نینگ ایران حربیلری نینگ ظلمی خصوصیده افغانستان حکومت نینگ دقتسیزلیگیدن تنقید قیلیب ایتیشیچه، افغانستان حکومتی، خلق ارا جماعهسی و انسان حقوقی ایرکین کمیسیونی نینگ بوتوغریده جیم تورمهیشی کیرهک.
عینحالده، افغانستان نینگ زاهدان شهریدهگی نمایندهلیگی مسووللریدن بیری مرتضی خرمی نینگ ایتیشیچه، افغانستانلیک مهاجرلرنی انتقال بیرهدیگن بیر موتر ایران نینگ یزد شهریده اوت آلگن و نتیجهده افغانستان یشاوچیلریدن 3 تهسی جان بیریب و باشقه 10 تهسی یرهلنگن دیر.
جناب خرمی نینگ بو واقعهدن حیاتده قالگنلردن نقل قیلیب ایتیشیچه، مذکور موتر ایران حربیلری تامانیدن اوققه توتیلگن.
خرمی نینگ کوپهیتیریشیچه، بو واقعهنی تیکشیریش اوچون تیزلیککه افغانستان نینگ زاهدان ده بولگن نمایندهلیگیدن بیر هیات یوباریلهدی.
بوتوغریده مملکت تشقی ایشلر وزیرلیگی فکرنی آلیش اوچون سعی و حرکت قیلدیک، بیراق موفق بولمهدیک.
