بوگون (یک‌شنبه) کابل‌ده سپورتچی خبرچیلر بیرینچی کانگرسی آچیلدی. انه شو مناسبت بیلن اوتکزیلگن مجلس‌ده اجراییه اداره‌سی‌نینگ بیرینچی اورین باسری انجنیرمحمدخان، دولت رسمیلری بیر قنچه ولایت‌لرنینگ سپورتچی خبرچی‌لری و مملکت سپورتچی‌لر مسووللری اشتراک قیلگن ایدی.
سپورتچی خبرچیلر فدراسیونی‌نینگ باشلیغی سایر زلاند، اوشبو کانگرس آچیلیشی بیلن سپورت اداره لری و خبرچیلر اورته‌سی‌ده علاقه‌لری کوپراق بوله‌دی دیگن.
زلاند سپورتچی خبرچیلر اداره‌سی آچیلیشی‌دن نیت خبرچیلر اوچون کوپراق امکانیت یره‌تیب بیریش بولگن لیگی‌نی تیل‌گه آلگن.
شونینگ‌دیک ییغین‌ده جمهور رییس سوزلاوچی‌سی‌نینگ اورین باسری دواخان مینه‌پال صحبت قیلیب، بو کانگرس آچیلیش مناسبتی بیلن ایلک بار جمهور رییس غنی نماینده لیگی‌ده تبریک ایتیب، مملکت رهبری بو بولیم‌نی حمایت قیلیشی اوچون تیار ایکن لیگی‌نی بیلدیرگن.
ییغین‌ده اشتراک قیلگن سپورت اداره‌سی‌نینگ مسووللری، بو قبیل کانگرس‌لر آچیلیشی‌نی ییریک اهمیتی بار دیب، مملکت ده سپورت رواجله‌نیشی اوچون مهم آدیم حسابلنه‌دی دیگن‌لر.
اسیا اداره‌سی‌نینگ سپورت بوییچه سکرتر جنرالی جنرال امجد عزیزملک، کانگرس آچیلیشی توغریسی‌ده خوشلیک اظهار قیلیب، جاری ییل بیر قنچه خبرچیلر بو ساحه‌ده تربیه له‌نیش اوچون پاکستان و بحرین یوباریگن‌لر دیدی.
خبرچیلر خلق ارا فدراسیون باشلیغی جیانی میرالو انه شو مناسبت بیلن ویدیو پیغام یوللب، بونده‌ی کانگرس‌لر آچیلیشی افغانستانده سپورت رواجله‌نیشی اوچون مهم حرکت سنه‌له‌دی دیگن.
ییغین‌ده سپورت‌نینگ بیش کمیته‌سی مسوولی تانیشتریلگن و بیر قطار سپورتچی خبرچیلرگه هم آلقیش بیریلگن.
