بوگون «پنجشنبه» بدخشان یشاوچیلریدن یوزلرچهسی محلی حکومت رسمیلری سوزلریگه صادق بولمهگنی و ناتینچلیکلر میزانی آشگنی کوپهیگنی خصوصیده، فیضآباد شهریده ناراضیلیک نمایش اوتکزگنلر. اعتراضچیلر مذکور ولایت حاکمی و پولیس قومندانی چیکلنتیریلیشینی سورهگنلر.
اوشبو اعتراضچیلر ولایت ایشیگی برابریده توپلهنیب حکومت گه قرشی شعار بیریب ایتیشیچه، ولایت حاکمی و پولیس قومندانی چیکلنتیریلگونگهقدر ناراضیلیک نمایشدن قول تارتمهیدیلر.
اعتراضچیلرنینگ ایتیشیچه، بدخشان ولایتینینگ وردوج، یمگان و جرم تومنلری قیتریب آلینیشی توغریسیده محلی حکومت رسمیلری سوزلریگه صادق بولمهگنی، ناتینچلیکلر میزانی آشگنی و سونگی ایکی هفته جریانیده کوهستان تومنی و تیشکان تومنیدن ایریم منطقهلر سقوط قیلگنی باعث، اولر بدخشان مرکزی فیضآباد شهریگه کیلیب و محلی حکومت رسمیلریدن حساب آلهدیلر.
اولرنینگ ایتیشیچه، قوراللی طالبلرنینگ نظارتی گه اوتگن منطقهلرنی قیتریب آلیش اوچون اولرنینگ تکراری ایستکلری نتیجهسیز قالگن و ناتینچلیکلر کوپهیگنی باعث، محلی رسمیلر استعفاء بیریشلری کیرهک.
جرم تومنی قاچقینلرینی نمایندهسی نجیبالله فخرینینگ ایتیشیچه، بدخشان تومنلرینینگ سقوطی و ناتینچلیکلر میزانی آشگنی محلی رسمیلرنینگ ظرفیتسیزلیگینی کورستهدی و اولر چیکلنتیریلمهگن صورتده، بدخشان وضعیتی بوندن کوره یمان بولیشی ممکن.
وردوج تومنی بدرغهلریدن رحمالدین نینگ ایتیشیچه، محلی و مرکزی حکومت بو تومن گه هیچ قندهی دقت قیلمهگن و شو یوزهدن وردوج حاضر ترورچیلرنینگ قرارگاهیگه اوزگرگن.
اونگه کوره، حکومت رسمیلرینینگ دقت سیزلیگی باعث، قوراللی طالبلرنینگ فعالیتی کینگهیگن و بو ولایتده باشقه منطقهلر هم دولت نظارتیدن چیقیشی ممکن.
عین حالده، بدخشان پولیس قومندانی جنرال عبدالخالق آقساینینگ ایتیشیچه، امنیتی کوچلر اهالی خوفسیزلیگی تأمینلنیشی توغریسیده بیفرق یاندهشمهگن و سونگی اوروشلرده دولت گه قرشی قوراللی عصیانچیلرگه آغیر زیان ییتکیزگن.
اونگه کوره، بدخشان ولایتینینگ برچه منطقهلریده قوراللی عصیانچیلرگه قرشی تازهلش عملیات دوام ایتماقده.
بدخشان ولایتینینگ اعتراضچیلری، بیر شرطنامه صادر قیلیب مرکزی حکومتدن محلی رسمیلر جملهدن ولایت حاکمی و پولیس قومندانینینگ چیکلنتیریشینی سورهگن و چیکلنتیریلمهگن صورتده، مذکور مسؤوللرگه قرشی ناراضیلیکلریگه دوام بیرهدیلر.
