افغانستانده ایرکین میدیالردن حمایت قیلووچی دفتر یا-ده «نی» تشکیلاتی، افغانستان میدیالریده تدقیقاتی ایشلر خصوصیده، قولگه کیریتگن معلوماتی‌نی ترقه‌تیب ایتیشیچه، فکر اورگه‌نیش‌ده اشتراک قیلگن میدیالر و خبرچیلردن 83 فایزی، مملکت‌‌ده تدقیقاتی گزارشلر تیارلش برابریده معلومات‌گه قول تاپه آلمس‌لیک‌نی اینگ جدی توسیق دیب بیله‌دیلر.
افغانستانده ایرکین میدیالردن حمایت قیلووچی دفتر یا-ده «نی» تشکیلاتی اجراییه باشلیغی عبدالمجیب خلوتگرنینگ ایتیشیچه، حکومت خاص طریقه بیلن تدقیقاتی گزارشلر تیارله‌نیشی خصوصیده، چیکلاو ایجاد قیله‌دی و حکومتی منبع‌لر تورلی طریقه‌لر بیلن معلومات بیریش‌دن باش تارته‌دیلر.
جناب خلوتگرگه کوره، اوشبو فکر اورگه‌نیش‌ده کابل‌دن 20 میدیا مسؤولی و باشقه هرات، بلخ، قندهار و ننگرهار ولایت‌لریدن 40 میدیا مسؤولی اشتراک قیلگن‌لر. فکر اورگه‌نیش نتیجه‌سی اساسیده، تدقیقاتی گزارشلر تیارله‌نیشی توغریسیده معلومات‌گه قول تاپه آلمس‌لیک‌دن سونگ، مناسب و تینچ فضا یوقلیگی‌نی خبرچیلرگه قرشی ایکینچی کته توسیق دییلگن و میدیا مسؤوللریدن 30 فایزی‌نینگ ایتیشیچه، اوشبو توسیق اولرنینگ تدقیقاتی گزارشلرینی ناکام قیلگن.
بیراق، معلومات‌گه قول تاپیش خصوصیده نظارت کمیسیونی اعضاسی سیداکرام افضلی‌نینگ ایتیشیچه، معلومات‌گه قول تاپه آلمس‌لیک حاضرگچه تدقیقاتی خبرچیلر اوچون جدی قیین‌چیلیک سنله‌دی. جناب افضلی گه کوره، معلومات‌گه قول تاپیش کمیسیونی‌نینگ حاضرگی قانونی اساسیده، ولایت‌لرده هم باشقه کمیسیونلر ایجاد ایتیلیشی کیره‌ک، بیراق حاضرگچه حکومت بو ایش‌نی قیلمه‌گن.
معلومات‌گه قول تاپه آلمس‌لیک افغانستان میدیالری اینیقسه تدقیقاتی خبرچیلر اوچون اساسی قیین‌چیلیک سنه‌لیب و هردایم ناراضیلیک‌لرگه سبب بولیب کیلگن.
