افغانستان نینگ بویوک شهرلریدن بیرقطاری ده روزه هییت بیرهمی و قرنطین سیندیریلگنیدن سونگ، بیلیم یورتلر و مکتبلرنینگ ایشیکلری اوقووچیلر و بیلیم ایزلهیدیگنلرنینگ یوزی گه آچیلیشی کوتیلردی. بیراق، معارف و عالی اوقوو وزیرلیکلری نینگ ایتیشلریچه، حاضرگهقدر حضوری اوقیش باشلهنیشی اوچون هیچ بیر ریجه تیارلنمهگن.
افغانستان عالی اوقوو وزیرلیگی سوزلاوچیسی عزیزاحمد اوریاخیل نینگ سلاموطندارگه ایتیشیچه، «شنبه کون، 10- جوزا» جمهور رئیس ایکینچی اورین باسری محمدسرور دانش نینگ رهبرلیگیده یولگه قوییلگن اختصاصی ییغینده، تعلیمی ادارهلرگه مکتبلر و بیلیم یورتلرده حضوری درسلر باشلهنیشی توغریسیده ریجهلرینی تیارلب و کابینه گه یوباریشلری توغریسیده بویروغ بیریلگن.
جناب اوریاخیل نینگ ایتیشیچه، ساغلیقنی سقلش وزیرلیگی نینگ حضوری درسلر باشلهنیشی توغریسیده توشونچهسی قندهی بولگنی و بو ریجه کابینه تامانیدن تصدیقلنهدیمی یا-ده یوق؟ حاضرگهقدر آچیقلنمهگن.
بیراق، معارف وزیرلیگی نینگ سوزلاوچیسی نوریه نزهت، مکتبلرده حضوری درسلر باشلهنیشینی ساغلیقنی سقلش وزیرلیگی نینگ رهنمالیگی گه باغلیق دییدی.
اونینگ ایتیشیچه، کرونا ویروس تهدیدی و بو ویروس گه چلینگنلرنینگ سانی کونساین آشگن صورتده، مکتبلرنینگ درسلری حضوری شکلده باشلنمهسی ممکن.
ایتیش کیرهک کیم، کمیده بیر آی آلدین معارف وزیرلیگی نینگ سرپرستی محمدمیرویس بلخی، قویاش 1399- تعلیمی ییل برق و انترنت بولگن منطقهلرده آنلاین و تلویزیون آرقهلی و اوزاق بولگن منطقهلرده حضوری شکلده باشلهنیشینی ایتگن ایدی.
قویاش 1399- تعلیمی ییل باشلهنیشی مملکت ده کرونا ویروس رواجلنگنی باعث توختهتیلدی و ینگی تعلیمی ییل دن ایکی آیدن کوپراق اوتماقده، لیکن حاضرگهقدر دولتی بیلیم یورتلر و مکتبلرنینگ اوقووچیلرینی تقدیری بیللی بولمهگن.
حکومت کرونا ویروس نینگ آلدی آلینیشی اوچون باشقه دولتی ادارهلرنینگ یانیده مکتبلر و بیلیم یورتلرنی هم رخصت بیرگن.
افغانستان بویلب حاضرگهقدر 15 مینگ و 205 کیشی کرونا ویروس گه چلینگن. بو آرهدن 257 تهسی جان بیرگن و باشقه 1328 تهسی قیته ساغهیگن.
