له ماشومانو نه د ملګرو ملتونو د ملاتړ نړیوالې ادارې په خپل کلني راپور کې چې نن یې د ماشوم نړیوالې ورځې په مناسبت خپور کړی، ویلي چې په افغانستان کې د هرو پنځو ماشومانو له ډلې، دوه یې ښوونځي ته له تګ نه محروم دي.
په یاد راپور کې لیکل شوي چې افغانستان د نړۍ د نورو هېوادونو په منځ کې ۱۵۷ ځای لري. دغه راپور په ۱۷۶ هېوادونو کې روغتیايي، ښوونیزو، خوړو او امنیت ته د ماشومانو لاسرسي ته کتنه کړې ده. دغه راز د ماشومانو کار، د کم عمره ماشومانو ودونه او د جګړې او وژنو له کبله د ماشومانو بېځایه کېدل هم د دغه راپور برخه ده.
د راپور له مخې، که څه هم په افغانستان کې له تېرو دوو لسیزو راهیسې د ماشومانو په برخه کې د پام وړ پرمختګ کړی، خو بیا هم میلیونونه ماشومان ډېری خدمتونو ته لاسرسی نهلري.
راپور زیاتوي، له پنځو کلونو په کمعمره ماشومانو کې د ماشومانو د مړینې کچه ۶.۷۹ سلنې، د هغو ماشومانو چې وده یې نهده کړې ۴۰.۹، هغه ماشومان چې ښوونځي ته لاسرسی نهلري ۴۱.۹، او د کارګرو ماشومانو کچه هم ۲۹.۴ سلنې ته رسېږي او دا د ماشومانو په وړاندې اصلي ستونزې دي.
د دغه راپور له مخې، ۸۸ سلنه هغه ماشومان چې له ۶ تر ۲۴ میاشتو عمر لري، هره ورځ په ښه ډول نه تغذیه کېږي او په افغانستان کې روانه جګړه امکاناتو ته د ماشومانو د لاسرسي مخه نیولې ده. د دغه بنسټ د شمېرو له مخې، د افغانستان ۱۵ سلنه ماشومان د جګړې او نښتو له کبله اړ شوي چې خپلې سیمې او کورونه پرېږدي او بېځایه شي چې هلته هېڅ ډول لومړنیو امکاناتو ته لاسرسی نهلري.
- د افغان ماشومانو او میندو د خوارځواکۍ په اړه د یونیسف اندېښنه
- «په هرو ۱۰ ماشومانو کې ۸ یې د چاودنو قرباني کېږي»
په راپور کې د ماشومانو زدهکړې د هېواد د راتلونکې لپاره مهمه مسله یاده شوې او لیکل شوي، که څه هم له ۲۰۰۱ کال راهیسې زدهکړو ته د افغان ماشومانو، په ځانګړې توګه نجونو لاسرسی د پام وړ ډېر شوی، خو د تېرو کلونو په اوږدو کې تل پر ښوونځیو، ښوونکیو او زدهکوونکیو بریدونه شوي دي.
د راپور له مخې، د ۲۰۱۸ کال په لومړیو ۵ میاشتو کې ۸۷۰ بریدونه، ګواښ، د زدهکوونکیو وېرول یا د ښوونځیو په شاوخوا کې د حکومت له لوري شوې نښتې ثبت شوې دي.
په راپور کې لیکل شوي چې اوس شاوخوا زر ښوونځي د نامسووله وسلهوالو، افغان او بهرنیو ځواکونو له لوري ویجاړ او نیول شوي دي یا هم د جګړې او نښتو له کبله تړل شوي دي.
راپور دغه راز ښيي، که څه هم افغان ماشومان پورته امکاناتو ته لازم لاسرسی نهلري، خو دغه سازمان د تېرو ۲۰ کلونو پر مهال په دې برخه کې د افغان حکومت د پام وړ فعالیتونو، بریاوو او پراختیايي پروژو شاهد و.
