جمهور رییس سوزلاووچی‌سی‌نینگ اورین باسری شاه‌حسین مرتضوی‌نینگ سلام‌وطندارگه ایتیشیچه، پاکستان‌نینگ افغانستان‌گه بولگن اره‌لشوولری اوچون بیرلشگن ملت‌لر تشکیلاتی‌نینگ خوفسیزلیک کینگشی‌گه شکایت قیلیش اوچون حجتی بار.
او، مناسب زمانده بو حجت‌لر مذکور تشکیلات‌گه بیریله‌دی دیگن. اونینگ سوزلریگه کوره، بو ایش نینگ مسوولیتی مملکت تشقی ایشلر وزیرلیگی و افغانستان‌نینگ بی می تی‌ده‌گی دایمی نماینده‌سی ذمه‌سی‌ده دیگن.
افغانستان جمهور رییسی محمداشرف‌غنی اوتگن هفته مملکت‌نینگ ملی مجلسی مخصوص ییغینی‌ده قیلگن چیقیش‌ده پاکستان‌نی جدی تنقید آستیگه آلیب، او مملکت قولی‌دن بیرلشگن ملت‌لر تشکیلاتی‌نینگ خوفسیزلیک کینگشی‌گه شکایت قیلیش‌نی بیلدیرگن ایدی.
بیر قنچه سیاسی تحلیلچیلر، افغانستان حکومتی پاکستان‌نینگ بو مملکت ایشلریگه ارهله‌شیشی اوچون بیرلشگن ملت‌لر تشکیلاتی‌نینگ خوفسیزلیک کینگشی‌گه شکایت قیلیشی اوچون مناسب زمان کیلگن دیگن‌لر.
تحلیلچیلر، حاضرگی کونده دنیانینگ کوپ دولت‌لری جمله دن روسیه، چین و فرانسه هم بی می تی نینگ خوفسیزلیک کینگشی‌گه دایمی اعضالیک قیله دیگن‌لر. افغانستان پاکستان‌نینگ ترورچی‌لردن حمایت قیلیشی اوچون بیرلشگن ملت‌لر تشکیلاتی‌گه شکایت قیلگن حالده، مذکور مملکت‌لر تامانیدن دستکله‌نیشی ممکن.
کابل بیلیم یورتی‌نینگ استادی طاهر هاشمی، افغاستانستان حکومتی پاکستان‌نینگ اره‌لشوو توغریسی‌ده قولی‌ده دییرلی حجتی بار دیگن. شونینگ‌دیک جناب هاشمی، افغانستان بو مساله اوچون دنیا جماعه‌چیلیگی و بی می تی‌نینگ حمایتی‌نی قول‌گه کیریتیش اوچون لازم درجه ده سعی وحرکت قیلیشی کیره‌ک دیگن.
افغانستان‌نی بیرلشگن ملت‌لر تشکیلاتی‌گه پاکستان قولی‌دن شکایت قیلیش مساله‌سی بوندن اون کون آلدین کابل‌نینگ محمودخان کوپریگی یقینی‌ده جایلشگن مملکت ملی خوفسیزلیک اداره‌سی نینگ اونینچی حوزه‌سی‌ده اویوشتیریلگن خودکش هجوم ده 64 کیشی قربان بولیب، باشقه347 انسان حراجت آلگن دن کیین مهم مساله‌گه ایلندی.
اوشبو هجوم‌دن کیین جمهور رییس غنی تینچلیک مذاکره‌سی اوچون بوندن بویان پاکستان‌دن همکارلیک کوتمسلیک لازم دیدی.
