آمریکا جمهور رئیسی دونالد ترامپ، پاکستان باش وزیری عمران‌خان بیلن اوتکزگن صحبتیده ایتیشیچه، افغانستانده اوروش گه نقطه قویه آله‌دی، بیراق 10 میلیون انسان اوله‌دی و مذکور مملکت ییر یوزیدن یوق ایتیله‌دی.
افغانستان جمهورلیک ریاست سرایی، بو بیانات گه عکس‌العمل بیلدیریب ایتیشیچه، بیزلرنینگ دنیا اینیقسه آمریکا قوشمه ایالت‌لری بیلن بولگن شراکت و همکارلیک‌لریمیز ایکی تامانلمه منفعت‌لر و حرمت گه باغلیق بولگن.
اوشبو خبرنامه‌ده کیلیشیچه، «بیزلر تینچلیک خصوصیده، آمریکا همکارلیگی‌دن حمایت قیله‌میز، لیکن بیزلرنینگ مملکت میزنی اساسی تقدیری افغانستان رهبرلری نینگ غیابیده چیت‌ایللیک‌لرنینگ ییغینیده تعیین ایتیلمه‌یدی. افغانستان بوتون اقتداری بیلن دنیا سیاستی نینگ صحنه‌سیده دنیا باریچه قاله‌دی.»
جمهورلیک ریاست سرایی، بو بیانات توغریسیده واشینگتن دن آچیقلیک بیریشینی طلب قیلگن.
اوتگن کون «دوشنبه، 22- جولای» آمریکا جمهور رئیسی دونالد ترامپ، پاکستان باش وزیری عمران‌خان بیلن اوچره‌شگنیدن سونگ، اوروش یولیدن اوروش یوتوقی خصوصیده خبرچی‌لردن بیری نینگ سوراغی گه جواب ایتیشیچه، «بیز افغانستانده شونده‌ی اوروشیب و یوتوققه ایریشیشنی ایسته‌گنیمزده، بیر هفته ده مؤفق بوله‌میز. لیکن مین 10 میلیونلرچه انسان اولیشی‌نی ایستمه‌یمن. می‌نینگ افغانستان اوچون برنامه‌لریم بار. بو اوروش ده غلبه قازانیشنی ایسته‌گنیم‌ده افغانستان، دنیا خریطه‌سیدن یوق ایتیله‌دی. او هم اون کون جریانیده. مین بونی ایستمه‌یمن و بو یولدن بارمه‌یمن.»
جمهور رئیس ترامپ، افغانستان توغریسیده بولگن برنامه‌سی توغریسیده آرتیقچه معلومات بیرمه‌گن، بیراق ایتیشیچه، پاکستان شامل منطقه مملکت‌لری بیلن بیرگه قوشمه شکلده ایشلشنی مناسب بیله‌دی. اونگه کوره، پاکستان طالبان گروهی بیلن کیلیشوو ایجاد قیلیب و افغانستانده آمریکانینگ جاری اوروشی گه نقطه قوییب و آمریکا عسکرلرینی بو اوروش‌دن چیقاره آله‌دی.
