بوگون «شنبه» بغلانده کرکر تاش کومیر کانینینگ ایشچیلریدن یوزلرچهسی، مذکور کان یاپیلگنی توغریسیده اعتراض بیلدیریب، پلخمری شهریده ناراضیلیک نمایش یولگه قویگنلر. اولرگه کوره، اوشبو تاش کومیر کانینینگ قازیب چیقاریش ایشی توختهتیلگنی باعث، 582 کانچی ایشسیز قالگن.
مذکور کاننینگ قازیب چیقاریش ایشی کمیده 9 آی آلدین، افغان کول ناملی بیر خصوصی شرکتگه بیریلگن.
اوشبو اعتراضچیلر، مرکزی حکومتدن کرکر تاش کومیر کانی قیتهدن دولتی بولیشی و اولر اوچون ایشگه زمینه یرهتیلیشینی سورهگنلر؛ دولتی بولمهگن تقدیرده، اولر ناراضیلیکلرینی کینگهیتیریب و کابل- شمال قتناو یولینی ترافیک اونگیده یاپهدیلر.
اعتراضچی ایشچیلردن بیری سخی دادنینگ ایتیشیچه، افغان کول خصوصی شرکتینینگ بیرینچی کوندن ایشلشگه ارادهسی یوق ایدی و شونینگدیک، ایشچیلرنینگ آیلیگینی کمهیتیرگن. او، مذکور خصوصی شرکتدن کرکر کانینینگ قازیب چیقاریشگه کوچی ییتمسه، اونی دولتگه تاپشیریشینی سورهدی.
افغان کول شرکتینینگ رسمیلری، بوتوغریده جواب بیریشگه حاضر بولمهدی؛ بیراق ایتیلیشیچه، کرکر کانی امنیتی تهدیدلر و افغان کول خصوصی شرکتیدن دولتگه قرشی قوراللی طالبلر باج آلیشی باعث، یاپیلگن.
کمیده بیر آی آلدین، بغلان کرکر تاش کومیر کانینینگ 42 کانچیسی ناقانونی قوراللی کیشیلر تامانیدن اوغیرلندی و اولر قوییب یوباریلگنیدن کیین، اوشبو تاش کومیر کانینینگ قازیب چیقاریش ایشی توختهتیلدی.
عین حالده، شمالدهگی تاش کومیر کانلر باشلیغی داد محمد زازینینگ ایتیشیچه، بو توغریده جمهور رییس غنی و مملکت کانلر و پترولیم وزیری بیلن سوزلشگن و ایکی کون ایچیده اوشبو کانچیلرنینگ قیینچیلیگی توغریسیده چاره تدبیر کوریلهدی.
بغلان ولایتیده 5 تاش کومیر کان موجود، اوشبو کانلر مذکور ولایتنینگ تالهو برفک، ده صلاح، اندراب، نهرین و پلخمری تومنلریده جایلشگن.
بیراق، کرکر کانی قویاش 1386- ییل حکومت تامانیدن خصوصی بولیمگه تاپشیریلدی و اوشبو کاننینگ قازیب چیقاریش قراردادی حاضرگچه 30 خصوصی شرکت آرهسیده قولمه قول بولگن.
