تخار ولایتینینگ بهارک تومنیده یوزلرچه اعتراضچی تالقان- خواجهغار قتناو یولینی توسگنلر.
بوگون ایرتهلب تخار ولایتینینگ بهارک تومنی یشاوچیلریدن یوزلرچهسی ناراضیلیک نمایشگه قول اوریب 7 تومننینگ قتناو یولینی توسیب و بهارک تومنیده قوریلگن خشت پیشیرووچی کورهلر یاپیلیشینی طلب قیلگنلر.
اعتراضچیلرنینگ ایتیشیچه، بهارک تومنینینگ چایله منطقهسیده قوریلگن اونلرچه خشت پیشیرووچی کوره هوا افلاسلیگیگه سبب بولهدی.
اوشبو اعتراضچیلرگه کوره، انچه مدتدن بویان حکومتدن بهارک تومنینینگ چایله منطقهسیده فعالیت قیلهدیگن خشت پیشیرووچی کورهلر فعالیتی توختهتیلیشینی سورهگنلر؛ بیراق محلی حکومت اولرنینگ ایستکلری خصوصیده بیفرق یاندهشگنلر.
اعتراضچیلرنینگ ایتیشیچه، خشت پیشیرووچی کورهلردن کوتریلگن توتون محل یشاوچیلرینی تورلی کسللیکلرگه دوچار قیلیب و ایکینچیلرنینگ ایکینزارلریگه جدی زیان ییتکیزگن.
باشقه بیر تاماندن، خشت پیشیرووچی کورهلرنینگ ایشلاوچیلریدن اونلرچهسی تالقان- خواجهغار قتناو یولیگه چیقیب و خشت پیشیرووچی کورهلر فعال بولیب توریشنی ایستهگنلر.
عین حالده، بهارک تومنی پولیس قومندانی خلیل عزیزینینگ ایتیشیچه، اوشبو ولایتنینگ استیناف محکمهسی بیر مکتوب آرقهلی پولیسگه بویروغ بیرگن و محکمه تامانیدن حکم صادر ایتیلگونگهقدر خشت پیشیرووچی کورهلر فعالیت قیلمسلیگی کیرهک.
جناب عزیزیگه کوره، پولیس کورهلرنینگ ایگهلریگه خشت پیشیریش اوچون رخصت بیرمهگن؛ بیراق خشت پیشیرووچی کورهلرنی بوزیش اوچون محکمهنینگ قطعی حکمی گه احتیاج بار.
دیمک، شو حاضر بهارک تومنینینگ چایله منطقهسیده تورت خشت پیشیرووچی کوره فعالیت قیلهدی. اعتراضچیلرنینگ ایتیشیچه، ایستکلریگه ایجابی جواب بیریلمه گن صورتده، تالقان- خواجهغار قتناو یولی یاپیب قوییلیشی ممکن.
عین حالده، خشت پیشیرووچی کورهلرنینگ ایشلاوچیلری، حکومت اوشبو کورهلرنی بوزگن تقدیرده، ناراضیلیک نمایشگه قول اوریب و تالقان- خواجهغار قتناو یولینی یاپیش لری باره سیده آگاه لنتیرگن لر.
