افغانستان شمال شرقیده جایلشگن تخار ولایتی نینگ بیر قنچه یشاووچیلری همده مدنی جماعهچیلیک فعاللری، بوگون (دوشنبه) مملکت ملی کینگشی نینگ کیریش ایشیگی قرشیسیده توپلهنیب اعتراض بیلدیرگنلر.
اعتراضچیلر مرکزی حکومت ینه ولایت نینگ ملی مجلسدهگی اعضالرینی تخارده ترقیات لایحهلرنی عملی قیلیشده تفاوتسیز قالگن لیکده عیبلهگنلر.
اوشبو نمایشنی یولگه قویگن حفیظ اخگر، تخارلیک اوقوچیلر آچیق فضاده درس اوقیدی دیدی. ولایت نینگ ایریم منطقهلری اهالیسی اوچون یول قوریب بیریلمهگنلیگی خلقنی ینه کته معمالر بیلن دوچار قیلگن دیدی مذکور اعتراضچی. جناب اخگر، تخار ولایتی نینگ ملی مجلسدهگی اعضالری خلق نینگ آوازینی سوء استعمال قیلیب، ولایت خلقینی بوتونلی اونوتیب یوبارگن لیکلرینی تیلگه آلگن.
تخارلیک باشقه بیر مدنی فعال جمیل کوثر، ولایتده کون –سایین نابرقرارلیک میزانی آشیشی، ایشسیزلیک و زمانوی یوللر بولمهگنلیگی تخارلیکلرنینگ اساسی و بنیادی قیینچلیکلریدن حسابلنهدی دیگن.
شونینگدیک تخار ولایتی نینگ ملی مجلسدهگی اعضلری سونگی نیچه ییل جریانیده ولایت نینگ عمومی یوللری قوریلیشی اوچون هیچ بیر ایش قیلیشگه موفق بولمهگنلر دیدی جناب کوثر.
عین حالده جناب کوثر، تخار ولایتی نینگ مرکزی بولمیش تالقان شهرینی آلتی تومن بیلن باغلاووچی یول بوتونلی ویران بولگن دیگن. اوشبو یول نینگ قوریلیش لایحهسی بوندن 15 ییل آلدین تیکشیریلگن، لیکن عملده بیر ایش قیلیش اوچون هنوزگچه آدیم کوتاریلمهگنلیگی تاکیدلنهدی.
ولایت خلقی نینگ بو اظهاراتلرینی رد قیلگن تخار ولایتی نینگ نمایندهلر مجلس اعضاسی مریم کوفی، بولر امکان قدر اوشبو ولایتده ترقیات لایحهلر عملگه آشیریلیشی اوچون سعی وحرکت آلیب بارگن لیگلرینی تیلگه آلگن.
خانم کوفی، افغانستان فوایدعامه و قیشلاقلرنی رواجلنتیریش وزیرلیکلری تامانیدن ییل نینگ ترقیات بودجهسی صرفلنمهگن لیگی ولایتدهگی برق همده یول قوریش پروژهلرینینگ ایشی عملی بولمسلیگیگه یگانه توسیق بولدی دیدی.
تخارنینگ پارلماندهگی وکیلی، کیلگوسی ییلده ولایت نینگ ایریم بولیملری اوچون ینگی لایحهلر آلیش اوچون کوپراق سعی و حرکت آلیب باریشلرینی بیلدیرگن.
ناراضلیک نمایش اداغیده حکومتنی آگاهلنتیرگن تخار ولایتی نینگ اهالیسی همده مدنی فعاللری، ایستکلریگه تیز آره ده اعتبار بیریلمهگن حالده، نمایشلریگه دوام بیریش خصوصیده اورغوله گنلر.
