سره لهدې چې د هېواد په ځېنو سیمو کې د جنګ میدان د طالبانو او افغان امنیتي ځواکونو ترمنځ ګرم دی؛ خو د ملي دفاع وزارت د طالبانو له ماتې خبر ورکوي.
د ملي دفاع وزارت سرپرست وزیر اسدالله خالد د کابل کمانډويي ځواکونو د نوي قواماندان د معرفۍ په مراسمو کې وویل چې د طالبانو الفتح عملیاتو هېڅ پرمختګ نهدی کړی او د هېواد په مختلفو برخو کې د دې ډلې بریدونه په شا تمبول شويدي.
د ښاغلي خالد په وینا، طالبان د تېرو کلونو په پرتله سږکال د هېڅ لوی ښار په نیولو نهدي بریالي شوي.
خو د پوځي چارو شنونکی جاوید کوهستانی د ملي دفاع سرپرست وزیر خبرې له واقعیته لېرې بولي.
ښاغلی کوهستانی سلام وطندار ته وايي، سره له دې چې طالبان د هېواد په ځېنو برخو کې پوځي عملیاتو کې تلفات ورکړي؛ خو افغان امنیتي ځواکونه هم تلف شويدي.
د دې پوځي شنونکي په خبره، طالبان اوس هم په هغو سیمو چې کنټرول لرولو، تسلط لري.
دا پهداسې حال کې ده چې په وروستیو دوو اوونیو کې د کابل ښار په دننه کې د افغان امنیتي ځواکونو پوستې د طالبانو تر برید لاندې راغللې.
طالبانو په وروستیو موردو کې د کابل ښار اړوند اوومې ناحیې کې د پولیسو پر پوسته او د پلچرخي په تنګي سیمه کې د عامه نظم ساتونکيو باندې برید کړیو.
