پارلمان سیلاولری اوتکزیلیشی، سیاسی، امنیتی و مالی قیین‌چیلیک‌لر ییچیلیشی‌گه باغلیق.
جمهور رییس سوزلاووچی‌سی نینگ اورین باسری سیدحفیظ هاشمی، اوشبو مطلب‌نی بیان ایتیب ایتیشیچه، پارلمان سیلاولری زمانی و نماینده‌لر کینگشی ایشی دوام ایتیشی اوچون، اساسی قانون نینگ بیشینچی فصلی 83- ماده‌سی ایضاح‌له‌نیشی اوچون عالی محکمه‌گه یوباریلگن.
افغانستان اساسی قانونی‌نینگ بیشینچی فصلی 83- ماده سی‌گه کوره، نماینده‌لر مجلس ایش دوری بیشینچی ییل سرطان آیی نینگ بیرینچی کونی‌ده یکونلنه‌دی و بوندن کیین ینگی مجلس ایش‌گه باشله‌یدی.
ایتیش لازم پارلمان سیلاولری نماینده‌لرنینگ ایشی یکونلنمس‌دن ایکی آی آلدین اوتکزیله‌دی.
جناب هاشمی‌گه کوره، جمهور رییس اساسی قانون‌گه قرشی هیچ بیر ایش قیلمه‌یدی.
جمهور رییس غنی بوندن آلدین پارلمان سیلاوی توغری‌سیده ملی اجماع لازم لیگینی ایتکن ایدی.
شونینگ‌دیک جناب غنی سیلاولر ایرکین کمیسیونی و بیرلشگن ملت‌لر تشکیلات اداره‌سی‌گه بیش کون وقت بیریب، بو توغریده اوز فکرلرینی المشتیریب اوشبو قیین‌چیلیک اوچون ییچیم یول تاپیشنی ایسته‌گن ایدی.
پارلمان سیلاولری سنامجلسی ییغینی‌ده هم بحث گه آلینگن. سنامجلسی نینگ ایکینچی اورین باسری محمدآصف صدیقی‌گه کوره، جمهور رییس اساسی قانون یاغدولیگی‌ده پارلمان سیلاوی توغری‌سیده قرار آلیشی کیره‌ک.
باشقه تاماندن، ملی کینگش‌نی ایکّی مجلسی‌ده بیرقطار نماینده‌لر پارلمان ایشی دوام ایتیشینی قانون‌گه قرشی دیب بیله‌دی.
اوتکن کون نماینده‌لر کینگشی باشلیغی عبدالرووف ابراهیمی نینگ ایتیشیچه، حاضر مجلس‌نی 16- دوره 9- ییغینی دیر و حاضرگچه 17- دوره باشلنمه‌گن و بیرقطار نماینده‌لر نینگ مجلس ایشی ناقانونی دیگن ادعالری‌نی رد قیلدی.
باشقه تاماندن، سنامجلسی‌گه کوره، سرطان آیی باشلنگنی‌دن کیین نماینده‌لر کینگشی نینگ ایشی دوام ایتیشی قانون‌گه قرشی دیر. سنامجلسی، سرطان آیی گچه پارلمان سیلاولری زمانی بیللی بولمسه، اولر نماینده‌لر کینگشی تامانیدن تصدیق لنگن قرار لرگه قرشی لیک کورسته‌دی.
عین حالده، نماینده‌لر کینگشی تشقی علاقه‌لر کمیسیون اعضاسی قادر زازی وطن‌دوست نینگ سلام وطندار بیلن تلیفونی سوزله‌شیب ایتیشیچه، ایکّی مجلس باشلیغی جمهور رییس بیلن اوچره شیب، پارلمان سیلاوی اوتکزیلیش زمان تیزلیک‌ده بیللی بولیشی اوستی‌گه تأکید قیلگن‌لر.
