د ولسمشر د ویاند مرستیال شاه حسین مرتضوي وایي، حکومت د ولسي جرګې او ولسوالیو شوراګانو د ټاکنو لهپاره چمتووالی لري او تر هغه ځایه چې ټاکنې د حکومت ملاتړ ته اړتیا لري ملاتړ به ترې وکړي.
شاه حسین مرتضوي نن ورځ په کابل کې خبري غونډې ته وویل، حکومت د ټاکنو خپلواک کمېسیون له لوري د ولسي جرګې او ولسوالیو شوراګانو د ټاکنو نېټې اعلانولو ملاتړ کوي.
هغه وايي، کوم چمتووالي چې حکومت پورې اړه لري نیول شوی دی.
د مرتضوي په وینا، په هغه لیدنه کې چې محمد اشرف غني له مدني فعالانو او د سیاسي ګوندونو استازو سره لرله له هغوی وغوښتل د ټاکنو په بهیر کې ونډه واخلي او په دې توګه رڼې ټاکنې ترسره شي.
د قانون له مخې د ولسي جرګې ټاکنې باید په ۱۳۹۴ کال کې ترسره شوې وی، خو د امنیتي او ځینو نورو لاملونو له مخې وځنډېدلې.
