د افغانستان لپاره د اروپايي اتحادیې ځانګړی استاز رونالډ کوبیا وايي، د دې لپاره چې د افغانستان د څو کلونو لاستهراوړنې له منځه لاړې نهشي، دا اتحادیه د افغان سولې پروسې ضمانت ته چمتووالی لري.
نوموړي چې تېره ورځ (پنجشنبه) له خبریالانو سره خبرې کولې وویل، اروپایي اتحادیه د افغان حکومت د سولې منصفانه پروسې ضمانت ته تیاره ده چې په وینا یې دا د یادې اتحادیې د بهرني سیاست مسوولې فدریکا موګریني نظر دی او تراوسه افغان حکومت او امریکا ورته شین څراغ نهدی ښودلی.
د اروپايي اتحادیې ځانګړي استازي زیاته کړه، که د افغان سولې درېیم اړخ (طالبان) هم له دې نظر سره همغږي وي، دوی به د یادې پروسې لپاره لازمې او هراړخیزې هڅې وکړي. نوموړي د کلمبیا او فلېپین د سولې هوکړهلیک او د اندونیزیا او میانمار سوله په نړۍ کې د اروپایي اتحادیې د سولې ښې تجربې وبللې.
رونالډ کوبیا وویل چې دغه ضمانت به نظامي نه، بلکې د سیاسي او ډېپلوماټيک ملاتړ او د سولې هوکړهلیک د ښه پلي کېدو لپاره وي.
ملاعبدالغني برادر د طالبانو د قطر دفتر رییس شو
غني: د هر چا سره سوله غواړو؛ خو افغانان کمزوري نه دي
لاریون کوونکي: له اوربند پرته سوله ناشونې ده
.jpg)
کوبیا دغه راز وايي چې افغانستان باید له سولې وروسته په سیمه کې پر یوه اقتصادي مرکز بدل شي او دغه راز باید د سوداګرۍ، انرژي او اوبو ته د لاسرسي برخې کې پانګونه وشي.
د نوموړي په وینا، د ملي امنیت شورا له سلاکار حمدالله محب سره یې د ګډې غونډې پر مهال یوه تګلاره چې مادې یې لرلې، له افغان حکومت سره شریکه کړې ده. د افغانستان لپاره د اروپايي اتحادیې ځانګړی استازی د کابل پروسې درېیمه غونډه چې ټاکل شوې په مارچ میاشت کې جوړه شي، مهمه بولي.
نوموړی وايي، د سولې تامین او د ټاکنو کېدل مهم دي او دا دواړه باید یو د بل مخه و نه نیسي. رونالډ کوبیا ټینګار کوي: «اروپايي اتحادیه به تر سولې وروسته افغانستان پرې نه ږدي؛ ځکه تر سولې وروسته دا هېواد د سولې هوکړهلیک د مدیریت لپاره ډېره اړتیا لري.»
دا په داسې حال کې ده چې له طالبانو سره د افغان حکومت د سولې هوکړې لپاره هڅې چټکې شوې او یاده ډله اوس د افغان سولې په اړه له امریکايي ډېپلوماټانو سره په قطر کې خبرې اترې کوي.
