کله چې د خېرخانې د خرادیو هټیو ته ولاړم، افغان ټانک جوړونکی مې مسکا په خوله ولیده یو څه پښه نیولی شوم، خو فېضي زما او زما د همکار خواته را روان شو او له موږ نه یې تود هرکلی وکړ.
شیبه نه وه اوښتې، چې په چاپېره مو د فیضي خواږه ګاونډیان را تاو شول هریو په لیوالیتا او بې صبرانه ډول د فېضي د لاس جوړ شوي ټانک انځورنه او وېډوګانې یې راته په خپلو لاسي ټېلفونو کې ښکاره کولې او په ویاړ سره به یې ویلې، چې دا زموږ یو د افغان د لاس جوړ شوی ټانک دی.
ټانکونه نظامي زغره والې وسلې دي او د جګړې په ډګر کې کارول کیږي.
خو په زړه پورې داوه، چې ارمان فېضي دغه ټانک د خپلو کلیوالو خلکو د کلیوالي ستونزو د حل په موخه جوړ کړی و.
دی وايي چې "کله خپل ټاټوبي پنجشیر ته ستون شوم هلته مې د زمرد کان کارکونکي ولیدل، چې په خورا ستختو شرایطو کې په کان کې کار کوي" د ده په وينا هملته يې له دوی سره ژمنه وکړه، چې د دوی دغه حالت ته به د پای ټکی ږدي.
له ارمانونو ډک زړی ارمان، چې دا مهال په کابل کې میشت دی، یواځې یې تر شپږم ټولګي پورې زده کړې کړي او د اقتصادي ستونزو له امله یې د ځوانۍ له لومړیو څخه د خرادۍ کسب ته مخه کړې ده.
دی وايي، چې د دې ټانک د جوړولو لاهم ۱۵ سلنه چارې پاتې دي.
ده د ټانک جوړولو د مفکورې په اړه زياته کړه "کله چې د ملګرو سره، څو جمعې د پنجشیر زمردو کان ته لاړم د کان کارکوونکو په ډېرې ستونزې سره له کان د ننه د کراچې په وسیله تیږې او شګې را اېستلې له ځانه سره د کار کوونکو په حال خپه شوم" دوی وايې وروسته په ناببره د همدې ستونزې د حل په سوچ کې و، چې د کارګرو د اسانتيا په موخه ورته د ځنځير لرونکي ټانک جوړول يې ذهن ته راغله او له ځانه سره د دغه ټانک نقشه طرحه کړه.
ارمان وايي، چې وروسته له هغه بیا دغه ټانک د درېيو میاشتو په اوږدو کې جوړه کړه.
دغه ځوان ټانک يې په شخصي لګښت جوړ کړی او تل يې هدف دا وو، چې زيار کښو هېوادوالو ته باید د اسانتيا يوه وسيله رامنځ ته کړي.
ارمان زیاتوي، چې د کار د سر ته رسولو په اوږدو کې له ګڼو اقتصادي ستونزو سره مخ شوی، د زمرد دکان بې وزلو او خولې شویو کارګرو هغه بې وزله انځور یې د ټانګ جوړولو چارې لا ګړندې کړې.
ارمان له هیلو ډکې نړۍ څخه خبرې کولې او راز راز خیالونه او فکرونه یې د راتلونکي له پاره په سر کې لرل.
ارمان وايي، چې که دولت یې په دې برخه کې ملتیا وکړي، نو لرې به نه وي، چې په هېواد کې د کانونو د کارکوونکو ستونزې به حل شي.
دی د ټانک د وړتیا په اړه وايي، کولای شي چې په یو وخت کې یو ټن ټوکي ولیږدوي.
په تېرو ۱۳ کلونو کې د ارمان فیضي په څېر یو شمېر ځوانانو د داسې وسایلو په جوړولو توانیدلي و، چې د چارواکو له لوري ورته کومه پاملرنه ونه شوه.
ارمان فیضي د خبرو په پای کې وویلې، چې له حکومت څخه غواړي، څو د ټولنې ځوان قشر ته پاملرنه وکړي.
کله چې د فېضي له دوکان څخه مې څه واټن واخیست له ځانه سره مې و وېلې، چې ای کاش دولت داسې کسانو ته د کارونو د پراختیا له پاره ځانګړې پاملرنه کړي وای.
