ارزگان ولایتی عیاللریدن بیرقطاری‌نینگ ایتیشیچه، زوره‌وانلیک‌که قربان بولگن عیاللرنینگ کوپنچه‌سی شخصی اویلرده سقلنه‌دیلر. اولرنینگ ایتیشیچه، زوره‌وانلیک‌لرگه قربان بولگن عیاللر شخصی اویلرده تینچلیک حس قیلمه‌یدیلر.
اولرنینگ کوپه‌یتیریشیچه، عایله‌وی زوره‌وانلیک‌لر قطار عیاللرنینگ اویلرینی ترک قیلیب ترینکوت شهریگه کیلیشی‌گه مجبور قیلگن؛ بیراق مناسب مکان بولمه‌گنی باعث، اولرنینگ قیین‌چلیک‌لری حل بولمه‌یدی.
ارزگان ولایتی‌نینگ گیزاب تومنی یشاوچی‌لریدن بیری، ترینکوت شهریده فرقلی اویلرده یشب کیلگن و بو وضعیت‌دن خواطر بیلدیریب حکومت‌دن ارزگان ولایتیده خوفسیز اویلر قوریلیشی‌نی سوره‌یدی.
اونینگ ایتیشیچه، نیچه کیچه‌نی معصومه آتلی پولیس بیر عیال‌نینگ اوییده اوتکزیب و نیچه کیچه‌نی هم قوم کینگشی باشلیغی‌نینگ اوییده و شونینگدیک بیرکیچه‌نی قماقخانه‌ده اوتکزگن. او ایسه بو ییرده قالیب اوز ایسته‌گی بیلن تورمیش‌گه چیقیش‌نی ایسته‌یدی.
اویدن قاچگن عیاللردن باشقه بیری تاج بی بی‌نینگ ایتیشیچه، اونینگ تورموش اورتاغی یوق و عایله‌وی زوره‌وانلیک باعث اویدن قاچگن. اونگه کوره، خوفسیز اوی بولمه‌گنی سبب قیلگن ایشی‌دن پشیمان دیر؛ بیراق اولیم خواطری بولگنی باعث، اویگه قیتیب باره آلمه‌یدی.
سلام‌وطندارگه صحبت بیرگن انسان حقلری ایرکین کمسیونی‌نینگ ولایتی باشلیغی عبدالاحد ارزگان عیاللری‌نینگ انسانی وضعیتی‌دن خواطر بیلدیریب ایتیشیچه، عایله‌وی زوره‌وانلیک باعث ترینکوت شهریگه قاچیب کیلگن عیاللر او ییرده شخصی اویلرده سقلنه‌دی.
او، ارزگان ولایتیده خوفسیز اویلر توزه‌لیشی‌نی جدی نیازلردن بیلیب ایتیشیچه، کیم‌سه ساده‌لیک‌ده اویی‌نی قاچگن عیاللرنینگ اختیاریده قویمه‌یدی.
سلام‌وطندارگه صحبت بیرگن ارزگان حاکمی اسدالله سعیدی‌نینگ ایتیشیچه، ارزگان ولایتی پشتونلی مدنی بیر جماعه بولگنی باعث، خوفسیز اویلر قوریلیشی توغریسیده یخشی توشونیش کیره‌ک.
جناب سعیدی گه کوره، اوشبو قیین‌چلیک‌نی حل ایتیش اوچون کوپلب مصلحت قیلیش لازم و قاچگن عیاللر و عایله‌لرنینگ منفعتی گه بولگن ییچیم یول تاپیش درکار.
ارزگان مملکت‌نینگ ناتینچ و اوزاق ده قالگن تومن‌لریدن بیری دیر. مدنی فعاللرگه کوره، اوشبو ولایتده عیاللر کوپلب زوره‌وانلیک‌که قربان بوله‌دیلر. بیراق جمله‌دن یالغیز نیچه قضیه انسان حقلری کمیسیونی، عیاللر وزیرلیگی و عدلی اداره مراجعت قیلینه‌دی.
